admin
YiNtatheli kaMthunywa
ABANQOBE isicoco sikaMr loMiss Rural Zimbabwe sebenikezwe ithuba lokuthi bavule amabhizimusi ezokufuya, nanko phela banikwe amatsiyane angu-1000.
Lokhu ngokwakuqala kumbali yalumcimbi ohlose ukuthuthukisa intsha emaphandleni wonke eZimbabwe.
Iphenduke yacwebezela iGwelutshena kunsukwana ezedluleyo, ngesikhathi kuqhutshwa umcimbi womncintiswano kaMiss loMr Rural Zimbabwe.
Isiqinti seGwelutshena, esiseNkayi esabelweni seMatabeleland North, sibe ngesokuqala ukuphendla umcimbi lo ohlose ukuthuthukisa abasakhulayo kwezobuhle lokugcina amasiko emaphandleni.
UMiss loMr Rural Zimbabwe, uMelania Sibanda (21) uthethe isicoco sokuba nguMiss Rural Matabeleland North kuthi uSilethemba Moyo (19) loSandisiwe Ndlovu (22) abaseNkayi babe yinkosazana yokuqala leyesibili.
UThakazela Mayisa (20) odabuka eBubi umenyezelwe ukuthi nguMr Rural Matabeleland North njalo uMandatembo Chasombwa (22) oweBinga kanye loAvoid Sibanda (22) oweNkayi bakhethwa ukuba yinkosana yesibili ngokwehlukana kwabo.
UMiss Personality kube nguNomvelo Khumalo oleminyaka yokuzalwa engu-17 oweLupane.
Umcimbi lo uqhutshwe ndawonye lowokudinga ubuciko baphezulu kwezokubhekha lokuthunga impahla.
Kulumncintiswano kukhethwe uPrecious Mafoti oweThe House of Mafoti P Fashions, Bekithemba Khumalo oweBrandroom, uBukhosi Ndhlovu, Surprise Dube, Andile Ngwenya oweRoyal Hats loBrilliant David Manyeruke oweBreeze Classic Designs.
Bonke laba bazadibana kusigaba esilandelayo.
Ekhuluma ngemva komcimbi, umsunguli kaMiss Rural Zimbabwe uSipho Mazibuko uthe: “Sithanda ukubonga uMphathintambo uSithembiso Nyoni ngemiklomelo yabanqobileyo.
“Isibongo esikhulu siya kunkampani yeHamara enikeze umvuzo wamatsiyane. Injongo yikuthi abanqobi bethu bathathele phezulu ukuvusa imsebenzi yezandla. Ngibonga uSipho Woods obengumatron, obegcine abatayilayo ngothando lukamama.
“Uhlelo beluluhle. Abangu-20 abafinyeleleyo kusigaba sokucima bazinikele ngakho konke njalo basilwela kahle isicoco,” kutsho uMazibuko.
Online Reporter