Online Reporter
Fungai Muderere
Ikhomishini yezemidlalo lezokuzithokozisa iSports and Recreation Commission (SRC) isincome iqembu leHighlanders ngempumelelo yayo ekuthuthukiseni intsha, ukuthinteka komphakathi kanye lokuhlanganisa abantu, njengoba iqembu seliqalile ukuthakazelela iminyaka elikhulu.
Amazwi la abikwe lilunga lebhodi ye-SRC uDavid Simba emcimbini wokwethulwa ngokusemthethweni imgubho yeminyaka engu-100 eClubhouse yeBosso ngoMvulo emini.
“Kulumcimbi oqakathekileyo wokunanza iminyaka engu-100 yeHighlanders Football Club, i-SRC ihalalisela iqembu njalo ibuye yaveza ukusekela iqembu, abasekeli kunye lomphakathi wonke wakoBulawayo kunye leMatabeleland.
“Ukuzimisela kweqembu leHighlanders ukuthuthukisa ithalenta lokukhuthaza ukubambana kwabantu bonke kuyisibonelo esikhanyayo emidlalweni yeZimbabwe,” kutsho uSimba.
Wengezelele wathi, “Njengoba iHighlanders iqhubeka isenza umsebenzi omkhulu kumdlalo wenguqu e-Africa, i-SRC iphinda iqinisekise ukusekela umbono kanye lomsebenzi weqembu.
“Siyaziqhenya ngokuthi sisebenzisana kuhle kwezemidlalo eZimbabwe. Silifisela iminyaka eminengi yempumelelo yebhola, ukukhula kanye lokunqoba.”
“Siyayincoma iHighlanders ngokukhuthaza izizukulwane zabadlali, abalandeli kanye lomphakathi. Ilifa lenu libanzi kakhulu, njalo siyaziqhenya ngokusebenzisana lani ekukhuthazeni imidlalo lezokuzithokozisa.”
I-SRC ibuye yaveza ukuthi iqembu leBosso lidlale indima enkulu ekuthuthukiseni ibhola elizweni.
“Njengensika yebhola leZimbabwe, ukuthakazelela iminyaka elikhulu iqembu leHighlanders lisemdlalweni yibufakazi bokuzimisela, ukuzinikela kanye lobusebenza gadalala.”
Umcimbi lo ubuhanjelwe ngabantu abanengi, kugoqela labalandeli beqembu.
Omunye obekhona nguMsekeli kaSodolobho wakoBulawayo, uKhansila Edwin Ndlovu, owethule amazwi avela kuSodolobho uDavid Coltart, esithi iqembu lilesiko eselile sikhathi eside lokusebenzisa ezemidlalo ekubumbeni umphakathi ukuthi ube ngcono, ubambane njalo uthuthukise ubuntu.
Abanye abantu abaqakathekileyo kwezemidlalo akade bekumcimbi lo bagoqela amalunga ebhodi kanye labaphathi abaphezulu, imbongi edumileyo u-Albert Nyathi, iqhawe leqembu uSilas Ndlovu, umgcinisihlalo weqembu u-Amin
Soma-Phiri, uDouglas Mloyi, uGift Lunga (Snr), uMelusi Sibanda kanye losomabhizimusi uJabulani Nkomo phakathi kwabanye.
Isikhulu esiphezulu sePremier Soccer League uRodwell Thabe laye ubekhona.
Bekulamaqembu ezokuzithokozisa atshiyeneyo abethokozisa abantu kulo umcimbi.
