Online Reporter
Fungai Muderere
IHWANGE isiqinise ukubamba kwayo indawo yokuqala kuPacific Breeze Southern Region Soccer League ngemva kwemidlalo yeviki letshumi lambili.
Izimbamgodi zamalahle zihlezi phezulu zilemiklomelo engu-27 emidlalweni engu-11 ngemva kwesizini enhle ebabone benqoba imidlalo eyisitshiya galombili badlala ngokulingana kathathu.
IHwange iphinde yaba liqembu elivikela kuhle kakhulu kuligi njengoba ihlohlwe amabhola amathathu kuphela kodwa yona isitshaye angu-24.
Lanxa iHwange iqhubeka ibusa, umbango wokukhwela esigabeni esiphezulu usavulekile kakhulu.
ITalen Vision FC ehlezi endaweni yesibili iyaqhubeka isebenza nzima nanko ilemiklomelo engu-24 emidlalweni engu-12. Iqembu elixhaswa yiTrukumb Mining kalikaze linqotshwe kulisizini njengoba selinqobe imidlalo eyisithupha ladlala ngokulingana kweyisithupha, okutshengisa ukuzimisela lokungaguquki kwalo.
IBulawayo Warriors ihlezi endaweni yesithathu ngemiklomelo engu-23 emidlalweni engu-11, kuthi iJordan FC ibe lemiklomelo efanayo endaweni yesine ngemva kokunqoba kwayo kwangemuva. IJordan inqobe iBulawayo City nge 1-0 emidlalweni yeViki lesi-12 ukuze iqhubeke isembangweni wokukhwela phezulu.
Iqembu laseFilabusi belisesimeni esihle kakhulu kumaviki adluleyo, lihlanganisa impumela ezinhle kuligi lokudlala kuhle kuZifa Munhumutapa Challenge Cup. IJordan isivele yakhipha iTalen Vision leNkayi United kumncintiswano lo, okwenze ukuzethemba eqenjini kwanda kakhulu kulo.
Umbango wokungena phakathi kwamaqembu aphezulu etafuleni lawo uyatshisa. IBlack Rock ihlezi endaweni yesihlanu ngemiklomelo engu-20, kuthi iVictoria Falls Herentals leNkayi United zilemiklomelo engu-18.
Iqembu elake ladlala kuPremier Soccer League, iZimbabwe Saints, lihlezi endaweni yesificaminwembili liphethe-16 imiklomelo ngemva kokudlala ngokulingana 2-2 leBosso90. IChikwata izabe ifuna ukuqoqa imiklomelo eminengi kungxenye yesibili yesizini ukuze ivuselele amathemba ayo okukhwela phezulu.
Phansi kwetafula, iCasmyn, iBulawayo City kunye leZebra Revolution zisalokhe zilamathuba okuqhubeka zisondela emaqenjini aphezulu. Kodwa iNjube Spurs leKhami United zibhekane lomsebenzi onzima wokuphuma.
Ekucineni kwetafula, iMosi Rovers kanye le-Aqua Stars ziphethe imiklomelo ayisifica munwemunye, kuthi iBosso90 kanye leMbizo ziysadalala. IMbizo ibe lesizini enzima kakhulu njengoba isinqobe umdlalo owodwa. Lanxa iHwange isizibeke njengeqembu okufanele linqotshwe, iTalen Vision, iBulawayo Warriors leJordan FC zisekhona embangweni, okutsho ukuthi yonke imiklomelo izabaluleka.
