Online Reporter
Ugwalo: Umdumo wenkondlo elalotshwa ngu N.S Sigogo labanye
Inkondlo: Hloniphani ubabhemi eyalotshwa ngu EM Matshona
Ophezulu Stinta
Ukusetshenziswa kolimi.
Imbongi isebenzise ulimi oluhlabusayo ekwethuleni inkondlo le.
Babhemi nyamazan engcwele
Imbongi isebenzise ukwenzasamuntu lapha esethula ubabhemi lo ngenhlonipho enkulu okwamagama, aze amnikeze ubungcwele obuphiwa umuntu ngobuntu bakhe bokulunga ngezenzo.
Ubabhemi uphiwe amandla okulunga komuntu ofanelwe lizulu. Konke lokhu kungenxa yemisebenzi emihle ayenzayo ubabhemi, imbongi ize imbone efanele lokungena ezulwini.
Wanyonyoba sabunyonyo uthwel’ uMsindisi
Lapha imbongi isebenzise isifananiso, efanisa ukuhamba kukababhemi lobunyonyo. Imbongi lapha ibigcizelela ukuhamba ngesizotha langenhlonipho okwakusenziwa ngubabhemi lapho ethwele iNkosi okumele ihlonitshwe, kungamelanga kuhanjwe ngokudladlazela lapho ithwelwe konke lokhu kuveza ubuhle bezenzo zikababhemi lo ngoba uyananzelela kakhulu lokuthi umuntu lo othwelweyo uyahlonitshwa okwamagama mkhulu kumele aphakanyiswe ngendlela ephezulu.
Ubusisiw ozayo ngebizo leNkosi,
Hosana kweliphezulu!
Imbongi lapha isebenzise isibabazo, lapha esibonisa indlela ixuku elalijabulela ngakhona ukungena kweNkosi engu Jesu emagumeni ase Jerusalema, iphakanyiswa kangaka ibatshazwa ingena iphezu kukababhemi lo, othwele umuntu ohlonitshwa kangaka kuyamangalisa mpela okwamagama.
Wakhala zomel’ emehlweni akho,
Lalamuhla zilokhu zikhona, sizazesula ngani nyamazan engcwele?
Lapha sibona umbuzo ongadingi mpendulo. Ayikho impendulo engaphuma, ngoba ubabhemi kuze kube lalamuhla lokhu ongokhalayo, ziyehla izinyembezi zakhe njengasendulo, kodwa njengoba elokhu eqhubeka lemithwalo yakhe kanye lobunzima alabo ngokusebenza gadalala uyakhala ubabhemi kodwa ke njengoba edalelwe khona ukusebenza gadalala uzaqhubeka esebenza ekhala enjalo kungelamuntu ozamthulisa, abantu bona okwabo bafuna imisebenzi yabo yenziwe ngendlela abafuna ngayo. Kambe umuntu angazesula ngani lezo nyembezi, azesuleki ikakhulu lapho lomsebenzi osaqhubeka.
Imbongi iyaphinda ukusebenzisa isifaniso lapho ithi:
Uthul okomsindisi ebethelwe esiphambanweni, lob’ okwemvu ibulawa.
Lapha kugcizelela ukuthula kwenyamazana le engubabhemi, aso nyamazana engezwakala umsindo wayo mahlayana nje kungakhathalekile ubunzima ephakathi kwabo iyathula nje ithi zwi ifele ngaphakathi.Ngokunye nje okugcizelela isibindi sale inyamazana engubabhemi.
