marble nkomo
Nkosilathi Sibanda
IQEMBU leHwange liqhubeke liqinisa indawo yalo phezulu kwelogu kuZifa Southern Region Division One League ngemva kokuvula isikhala ngemiklomelo emithathu kumidlalo emine.
Iqembu leli lihlezi phezulu ngemiklomelo engu-10 njalo lokhe lingakanqotshwa nanko selaphumelela kumidlalo emithathu, ladlala ngokulingana kanye. Kunombolo yesibili, iBlackrock, ilandela ngemiklomelo eyisitshiya galolunye.
Ukukhokhela kweHwange kubonakale sobala ngesikhathi ichitha iCasmyn FC nge 5-0 enkundleni yeColliery. Impumela le ayizange ilethe kuphela imiklomelo yonke, kodwa iphinde yakhuphula i-goal difference yayo yaba ku +9.
ITalen Vision leNkayi United, zombili zilempumela efanayo eyisitshiya galombili. Ziqhubeka zibeka umthwalo kumaqembu aphezulu. IMegawatt FC leBulawayo Warriors zilandela ngemiklomelo eyisikhombisa, okutsho ukuthi umncintiswano wokukhwela kuPremier League usuqalile ukuvutha.
IBulawayo Warriors ibe phakathi kwamaqembu enze kahle kuliviki, ithola ukunqoba. Yaqala ngokunqoba iNjube United nge 2-0, yalandela ngokwehlula iBosso 90 nge 3-1. Lokhu kwenze yakhuphukela endaweni yesithupha, yazibeka phakathi kwamaqembu afuna ukukhwela.
IJordan layo iqhubeke iqansa ngemva kokunqoba i-Aqua Stars nge 2-1, kuthi iZimbabwe Saints inqobe iBlack Rock nge 3-0, ibuyela ngamandla phakathi kwengalane.
Kweminye imidlalo, iBulawayo City idlale ngokulingana nge 1-1 leMbizo emdlalweni obunzima, kuthi iZebra Revolution leNkayi United zidlale kwangabi khona elihlohlayo. IVictoria Falls Herentials layo ibanjwe nge 1-1 yiMega Watt.
Ngaphansi kwetafula, izinto ziqhubeka zisibanzima kuBosso 90, esele ihlezi phansi ingelamiklomelo ngemva kwemidlalo emine. IZebra Revolution leKhami United lazo zisengozini yokwehla, njalo kudingeka ukuthi ziguqule isimo masinyane.
Ilunga lebhodi, elibona ngenhlelo zeligi le, uTizirayi Luphahla uthe bayasuthiseka ngendlela umncintiswano oqhuba ngawo.
“Lanxa isizini isaqala, ukuncintisana sekutshisa ku Zifa Pacific Breeze Southern Region Division One League.
“Amaqembu amanengi asetshengisa isifiso sokukhwela kulogu. Silethemba lokuthi kuzaqhubeka kusibamnandi enkundleni, amaqembu anikeze ababukeli labalandeli ibhola elihlabusayo,” kutsho uLuphahla.
Online Reporter