Online Reporter
Nkosilathi Sibanda
IHwange Local Board iyaqhubeka ngokusondeza inhlelo zempilakahle kumphakathi ngemva kokuba ikilinika yeMpumalanga iqhube iMobile Baby Clinic lapho okwelatshwe abantwana abangu-114.
Kubantwana laba, abangu-52 ngamantombazana kuthi abangu-62 ngabafana abaseMpumalanga Phase leG-West.
Uhlelo lolu lunikeze abantwana usizo oluqakathekileyo olugoqela ukuhlolwa kwempilakahle okujwayelekileyo, ukukhangelwa kokukhula kwabantwana, ukuhlatshwa lokwelulekwa kwabazali labagcina abantwana.
Kumbiko wayo ngokuphumelela kwaloluhlelo, iHwange Local Board ithe: “Ngokusondeza uhlelo lolu emphakathini, abantwana abanengi bathola uncedo lwezempilakahle ngesikhathi esifaneleyo, okuqinisa ukukhula kwabo.”
Kusenjalo, uKhansila kaWard 10 eHwange, uSamuel “Barrakki” Tshuma, unxuse ingcitshi kwezempilakahle ukuthi zisize umphakathi ngokuvikela imikhuhlane.
I-Hwange Local Board ibonge ubukhokheli buka Ward 10 kunye lezisebenzi kwezempilakahle abazinikele ukusebenzela umphakathi.
