Online ReporterNkosilathi Sibanda
UKUQAKATHEKISA impilakahle yabesifazane kumqoka emphakathini njalo kuyinsika kunhlelo zengqubekela phambili elizweni.
Lokhu sekubonakale edolobheni leHwange, esabelweni seMatabeleland North lapho ikhansili yeHwange Local Board esizimisele ukuthi iphakamise impilakahle yabesifazane ngokuphawula uhlelo lokuhlolwa kwezifo ezitshiyeneyo ezigoqela itshukela lemvukuzane yamabele.
Uhlelo lolu lusungulwe ngomnyaka odluleyo ekilinika yelokitshini leMpumalanga. Ikilinika le ngeyeHwange Local Board.
Umongikazi omkhulu ekilinika le, uSindiso Mhlanga uthe uhlelo lwabo selube yimpumelelo njalo sebencedise abesifazane abavela endaweni ezinengi.
Uthe sekuze omama abedlula amatshumi ayisitshiya galolunye lasithupha eMpumalanga Clinic, kuthi abangamatshumi amabili lasithupha bedluliselwa kwezinye izibhedlela.
“Uhlelo lwethu lokuhlolwa kwabesifazane selube yimpumelelo. Abesifazane abahlala lapha eHwange lakundawo eziseduzane sebethole usizo eMpumalanga Clinic,” kutsho uMhlanga.
“Siyizisebenzi kwezempilakahle, sikhuthazwe linani labantu abaze lapha ukuzothola usizo. Kuyancomeka lokhu.
“Kodwa, phakathi kokujabulela lokhu, sikhuthaza abesifazane abasakhulayo ukuthi bakhuthalele ukuhlolwa imizimba yabo.”
Umongikazi uMhlanga ukhuthaze abesifazane ukuthi baqaphele imvukuzane yamabele lokuhlolwa izifo ezitshiyeneyo.
“Sikhuthaza abesifazane ukuthi baze ngobunengi babo bezohlolwa. Ukuphangisa kuyasiza,” kutsho uMhlanga.
Kusenjalo, isikhulumi seHwange Local Board, uMnumzana Dumisani Nsingo uthe kuyinhloso yabo ukuthi izakhamizi zeHwange zihlale zikwazi isimo sempilakahle yazo.
