Online Reporter
INDLOVUKAZI yomculo wezokholo uRebecca Malope, ithi kuyisibusiso ukuhlonitshwa isaphila ngomsebenzi wayo esiwenze iminyaka ephezulu kwengu-40.
URebecca umenyezelwe njengozohlonitshwa ngendondo yeLifetime Achievement kumaBasadi in Music Awards. Le miklomelo okuzobe kungokwesine ikhona, kanti izoba seJo’burg Theatre, eGoli, mhlaka 2 Ncwabakazi. Ekhuluma leSolezwe uRebecca, uthe uyachichima ngenjabulo ngalokho.
“Ngibonga izibusiso zikaNkulunkulu ngokuthi ngihlonitshwa ngisaphila. Ngibonga isibusiso lesi. Ngiyabonga kuNkulunkulu okutsho ukuthi ngimsebenzele kahle,” kutsho uRebecca.
Le ngwazi yodumo lwezingoma okubalwa kuzo iMoya Wami, Ngegazi LeMvana lezinye, izobe ingaqali ukuhlonitshwa ngalo mklomelo.
“Ngiyabonga kubantu baseNingizimu Afrika ukuthi abasinikeza le miklomelo labasibungazayo uma benza izinhlelo, bahlala becabanga legama lami liyavela. Ngibonga uthando,” utsho kanje.
Ugqugquzele abeza ngemva kwakhe ukuthi basebenze ngokuzinikela futhi bangayingabazi into uNkulunkulu abanikeze yona.
“Ungalingabazi ithalente uNkulunkulu akunikeze lona. Hlonipha ithalente usebenze kahle. Kubuhlungu ukubona umuntu omutsha olethalente kodwa ithalente lakhe lize life engalisebenzisanga ngendlela,” kutsho uRebecca.
Le miklomelo iqhakambisa abesifazane abenza kahle emculweni.
Phakathi kwabaqokwe eminxeni ehlukene kulo nyaka kubalwa kubo uZee Nxumalo, Pabi Cooper, Lerato Kganyago, DJ Zinhle, Azana, Makhadzi, Lwah Ndlunkulu, Nontokozo Mkhize, Xolly Mncwango labanye.
