Ijaha (20) ligwetshwe iminyaka 19 ngokudlwengula umakhelwane

The man was sentenced to 15 years’ imprisonment on the first count, and a further six months on the second, bringing the total sentence to 15 years and six months

Sukulwenkosi Dube-Matutu

KULEJAHA leGwanda elileminyaka engu-20 yokuzalwa eligwetshwe iminyaka engu-19 ngecala lokudlwengula umakhelwane walo ongaphilanga kuhle engqodweni kanye lokuhlasela ugogo kamamangala.

UBrian Farasi ovela eMawane Village umiswe phambi kukamantshi uNkosikazi Sithembiso Ndebele walilandula icala kodwa wagwetshwa ngenxa yobufakazi obuqinileyo.

Umtshutshisi kulelicala, uNkosazana Zanele Sithole, uthe uFarasi udlwengule umakhelwane wakhe oleminyaka engu-34 wabuye wahlasela ugogo kamamangala oleminyaka engu-73 ngemva kokumkhanda esenza lokho.

Uthe: “Mhlaka 12 Mbimbitho ngomnyaka ka-2018 ilanga selisiya ngomtshawendoda, ugogo kamamangala watshiya umamangala yedwa esiyakhangela umumbu emasimini.

“Ngemva kwemizuzu engu-30 ugogo kamamangala wathi efika egumeni, wezwa umzukulu wakhe ehlaba umkhosi.

“Wagijima wayalunguza ngefasitelea lendlu yokudlela wabona umsolwa ehlukuluza umzukulu wakhe emacansini.

Ugogo kamamangala wabuza umsolwa ukuthi wenzani waphuma emnyango wabaleka. Kubikwa ngemva kwesikhatshana umsolwa waphenduka wathola ugogo emile entubeni yomuzi wadobha isitina wamtshaya ngaso ekhanda.

Kubikwa ugogo wahamba wayabikela umakhelwane basebesiya emapholiseni okwenza umsolwa wabotshwa.

Ekwethuleni isigwebo sakhe, uNkkz Ndebele uthe loba umsolwa elandule icala kodwa ubufakazi obethulwe phambi kwakhe buveza ukuba umsolwa ulecala.

Uthe umsolwa uyingozi emphakathini yikho wahlukuluza abesifazana ababili ababengelamandla.