admin
NguLucky Tshabalala
IKHANSILI yakoBulawayo isiveze ukubana izaqala ukufaka ama-pre-paid meters amanzi lonyaka elokitshini le-Cowdray Park.Lumbiko wethulwe ngumqondisi uManjinela Simela Dube emhlanganweni wekhansili lentatheli obuseCity Hall ngoLwesibili kuyonale iviki.
Emhlanganweni lo kuvele njalo ukuthi ngomnyaka ozayo ukuvalwa kwamanzi kulakho ukuphenduka ngoba amanzi asemadamu ezabe esehlile kakhulu nxa izulu lingasananga kuhle lonyaka.
UManjinela Dube ulandise kabanzi ngenjongo zalawa mamitha, wathi benzela ukuthi abantu bangasebenzisi amanzi edlula lawo abayabe bekhangelele ukuthi bawasebenzise ngelanga.
“Injongo emqoka yaloluhlelo lokufaka ama-pre-paid meter yikwenqabela udubo lokusetshenziswa kwamanzi okudlulise amalawulo njalo lokusetshenziswa kwamanzi okungekho emthethweni,” kutsho uManjinele uDube.
Ubuye njalo waveza ukuthi lapho okuzafakwa khona amamitha la akusoze kuvalwe amanzi ngoba imitshina le kayihambelani lokuvalwa kwamanzi.
Uqhubekele phambili waveza ukubana isilinganiso samanzi okumele asetshenziswe yimuli nsukuzonke esamakhilolitha amahlanu asisoze siguquke ngakho-ke uzulu angethuki.
“Isilinganiso samanzi samakhilolitha amahlanu esingela mbadalo sizatholakala akusoze kwaba lenguquko endleleni yokutholiswa kwalesi silinganiso samanzi,” kulandisa uManjinela Dube.
UManjinela uDube uphethe ngokuthi nxa kungaba lengozi yomlilo kumbe imfa loba nje isidingeko samanzi adlula lawo angabe ethengiwe kuzaba lenani lamanzi elitholakala ngemva kokuqeda lawo ayabe ethengiwe kukanti-ke nxa kungaba lemfa abafelweyo bangahamba lephetshana elitshengisa ukuthi bekufiwe abasoze bajeziselwe ukusebenzisa amanzi amanengi.
“Kuzaba khona inani lamanzi elitholakala ngemva kokuba sokuphele lawo ayabe ethengiwe.”
“Nxa kulemfa izakhamizi zizabe zikhululekile ukuthi zize lephepha elifakaza ukuthi bekulemfa okuzenza zingajeziselwa lelinani lamanzi eledlula isilinganiso esikhangelelweyo,” kuphetha uManjinela uDube.
Online Reporter