admin
NguMsilisi Dube
KULENTOMBAZANA yelokitshini leLuveve koBulawayo eyabona ukuba iyunifomu yamapholisa iyadlisa yasiyitshontsha isenzela ukuba igade mahala ibhasi isiyawoda amatemba eBinga.
Untombazana lo, uLynet Matibenga oleminyaka yokuzalwa engu-19 wetheswa icala lokuzenza ipholisa.
Kuzwakale ukuba umsolwa wenza icala leli mhlaka 24 Nhlolanja ngesikhathi eseBinga.
Umtshutshisi wecala leli, uMnumzana Bruce Maphosa ubikele inkundla yeBinga kuyonale iviki ukuba umsolwa wazenza ipholisa ngoba efuna ukugada mahala ibhasi.
Kubikwa ngalelolanga umsolwa waqonda enkambeni yamapholisa eBinga ntambama wafika wazenza ipholisa ngoba efuna indawo yokulala.
Umsolwa wayegqoke iyunifomu yabo kungakho bacabanga ukuba ngomunye wabo njalo waqamba amanga wathi usebenzela enkambeni yeFairbridge koBulawayo.
Kuzwakale ukuba mhlaka 10 Mbimbitho umsolwa waphinda wacela ukulala enkambeni le. Ngenxa yokuba okulempondo akufihlwa emgodleni elinye ipholisa lananzelela indlela umsolwa ayesenza ngayo labona ukuba wayengayisilo pholisa langempela ngakho wasembopha.
Umsolwa umiswe emthethwandaba lapho avume khona ukuba wayengayisilo pholisa kodwa wayeboleke lezo mpahla ukuze agade mahala ayewoda amatemba akhe.
“Nkosi mina angisilo pholisa, ngaboleka izigqoko lezi komunye umngane wami ukuze ngigade mahala ngisiyadinga amatemba,” kutsho umsolwa.
Umsolwa utholakale elecala lokuzenza ipholisa ngakho wagwetshwa ukuyapika entolongweni okwenyanga eziyisithupha kumbe ahlawule imali engange-$200.
Umantshi bekunguMnumzana Stephen Ndlovu.
Online Reporter