Online Reporter
Nkosilathi Sibanda
ABATHANDA ukubhukutsha koBulawayo bazathola ukuphumula okwenyanga ezintathu, nanko ikhansili yalelidobho ibika ukuthi isivale zonke indawo zokubhukutsha, kulandela ukugqitshwa kwesizini yomdlalo.
Ikhansili ilendawo zokubhukutsha enziniki yedolobho, iCity Pool lezinye ezisemalokitshini atshiyeneyo eLuveve, Mpopoma, Barbourfields, Barham Green le-North End.
Ikhansili ibeke umbiko isazisa uzulu ngokuvalwa kwendawo zokubhukutsha.
“Isaziso ngokuvalwa lokuvulwa kwama-swimming pools ekhansili yakoBulawayo ngesikhathi sebusika. Idolobho lakoBulawayo lithanda ukwazisa amalunga omphakathi ukuthi isizini yokubhukutsha ka2024/2025 izaphela ngeSonto mhlaka 4 Nkwenkwezi 2025.
“Ngokunjalo ama-pools wonke kamansipala azavalwa kusukela ngoMvulo mhlaka 5 Nkwenkwezi kuze kuyefika ngoLwesine mhlaka 21 Ncwabakazi 2025. Isizini entsha, (2025/2026) izaqala mhlaka 22 Ncwabakazi 2025,” kubika ikhansili, kumbiko owethulwe ngoLwesithathu kuliviki.
Ukuvulwa kwendawo zokubhukutsha eLuveve laseMpopoma koBulawayo kuminyaka edluleyo kwavuselelwa amaphupho alabo abalethalenta lokubhukutsha abaphuma emalokitshini akulelidolobho.
Indawo lezi bezivulwa kusukela ngehola lika-10 ekuseni ziyevalwa ngo-1pm, ziphinde zivulwe ngo-2pm zivalwe ngo-6 ntambama.
