Ikhansili yeHwange iqinisa imithetho ngezinja

Several countries have taken a firm stance against pit bulls due to safety concerns, with outright bans or strict regulations in place. Among these are the United Kingdom under the Dangerous Dogs Act, Australia, New Zealand, and parts of Canada such as Ontario.

Nkosilathi Sibanda

IHWANGE Local Board isiqinise imithetho yokugcimwa kwezinja kulandela isehlakalo sokulunywa komntwana oleminyaka engu-12 eBaobab, kulelidobho.

Isehlakalo lesi senzakale ngeviki edluleyo.

Kumbiko wayo, ikhansili ithe ikhathazeke kakhulu ngokwenzakalayo, ngoba inja le, yohlobo lweRottweiler yaphuma egumeni langakibo yayaluma umntwana lo emgwaqweni.

Umntwana lo kuthiwa usesibhedlela lapho elatshwa khona.

Ikhansili ithe isehlakalo lesi siveze ingozi enkulu ebangelwa yizinja ezihamba hamba emigwaqweni zingabanjwanga, ezilakho ukuhlasela abantu, ikakhulu abantwana.

“Ngenxa yalezi zehlakalo, sithatha amanyathelo aqinileyo okuvimba ukuthi lokhu kungaphindi kwenzakale lokukhuthaza abanikazi bezinja ukuthi baziphathe ngendlela efaneleyo,” kutsho umbiko wekhansili.

“Kusukela mhlaka 20 Mabasa 2026, akusavunyelwa ukuthi umuntu agcine izinja endaweni engelalo uthango oluqinileyo, umduli kumbe ezinye izindlela eziqinileyo zokuzivimba ukuthi zingaphumi.

“Izinja ezizatholakala zihamba hamba zizathathwa yikhansili, kulandelwa imithetho. Abanikazi bezinja abangazigcini ngendlela efaneleyo bazajeziswa ngokomthetho, okugoqela ukuhlawuliswa imali kumbe ukuthathelwa izinja zabo.”

IHwange Local Board iphinde yakhuthaza ukuthi labo abangeke bakwazi ukugcina lokuvimba izinja kuhle, bacetshiswa ukuthi bangazigcini.

Kusenjalo, kubikwa amapholisa ekhansili aseqalise uhlelo lokubala izinja lokuhlola imizi, oluqale mhlaka 13 Mabasa 2026, ngenhloso yokuqinisekisa ukuthi abantu bayalandela imithetho.