admin
YiNtatheli kaMthunywa
IZIMBABWE idibana lesizwe seIndia kumidlalo emihlanu yekhilikithi kusukela ngoLwesihlanu.
Phakathi kwemidlalo le, amazwe womabili azangena kulowo owe-T20 kanye lehlandla elijwayelekileyo elama-One Day International. Imidlalo izaqala eHarare.
Okwamanje akwaziwa ukuthi yiphi imidlalo ezaqhutshwa koBulawayo kodwa uMthunywa uzwe ngokugcweleyo ukuthi inhlanganiso yeZimbabwe Cricket ithe ukuletha imidlalo koBulawayo kuyadula.
Inkundla yeQueens Sports Club koBulawayo kade yacina ukunxuswa amazwe ngoba imidlalo yonke kuminyaka edluleyo ibiphelela eHarare.
IZimbabwe ilenkundla ezimbili ezavunyelwa ukudlalelwa ikhilikithi yomhlaba — iQueens leHarare Sports Club.
Abalandeli abaseHarare sebekholise kakhulu ukubukela intshantshu ezivela kwamanye amazwe, kuthi labo abakoBulawayo lakwezinye indawo eziseduzane babukela kumabonakude.
Isizwe seIndia sivakatshela eZimbabwe sivela nqotshwa lula yithimu yaeBangladesh kunyanga edluleyo.
Lokhu kufaka amaChevrons eZimbabwe ethubeni elihle lokuphindisela ukudliwa kweIndia. Amalungiselelo eZimbabwe wona kukhanya aqhuba kakuhle.
Umqeqetshi uDavid Whatmore ubikele uMthunywa ngoLwesithathu ukuba uyakholwa abafana bakhe bazadlala kusuthiseke abalandeli.
UWhatmore uyaqala ukuqeqetsha enkundleni zakuleli. Eqhatshwa kulumsebenzi, waphiwa umlandu wokuqeqetsha isizwe kumqhugelwano weWorld Cup.
Iqembu le-India lifike eHarare ngoLwesibili ntambama lilabadlali abalitshumi lane. Omunye wabadlali babo abathenjiweyo uKarn Sharma ukhitshwe eqenjini kulandela ukulimala kwakhe isandla.
USharma ebezahlupha kumidlalo le ngoba waziwa ngokujika ibhola elinzima kutshayeka kubo-batsman abanengi.
Kusenjalo, isizwe seNew Zealand laso kukhangelelwe ukuthi sethekelele iZimbabwe ngoNcwabakazi. Iphephandaba leCricinfo libika ukuba amaBlack Caps lawo azodlala kahlanu kuleli kumidlalo yeT20 lamaODI.
Leqembu leWest Indies lilungiselela ukufika kuleli ngemva kwalumdlalo kodwa lisamelele ukuzwa imvumo kunhlanganiso yeZC.
Imidlalo yonke iyabe iseHarare njalo.
Online Reporter