admin
YiNtatheli KaMthunywa
OWAKE waba ngukaputeni weHighlanders uInnocent Mapuranga useduzane lokusayina i-contract yokudlalela iqembu leTsholotsho FC kuhlandla lesibili leligi ephakemeyo.
Iphephandaba likazulu liphethe ubufakazi obuphezulu obuveza ukuthi uMapuranga usecabange ukuthi ayeqedisa ukuvimba kwakhe kunguqu esenkambeni yeZiqholo zeZhwane.
UMapuranga ucine ukudlala inguqu ekuqaleni kwalumnyaka andubana axotshwe ngumqeqetshi uBongani Mafu.
Umdlali lo wafela ukuthi ubesedelelwa ngamathimu amanengi ngenxa yokuswela isiqubu. Esinye sezizatho zokususwa kwakhe kuBosso kwakuyikuthi usekhulile.
UMafu wakubeka egcekeni ukuthi inhloso yakhe yikusebenza labadlali abasacathula.
Kuqembu leTsholotsho FC kuzwakala ukuba uMapuranga ulakho ukufika athole imidlalo eminengi. Nxa isivumelwano lesi singagcwaliseka, kutsho ukuba uMapuranga uzahlangana lezinye ezadla ubhedu ezibalisela uJoel Luphahla loDanisa Phiri.
Ngokutshintshela kubadlali asebekhulile kunguqu, iTsholotsho ibika ukuba izimisele ukukhwela kunombolo ekuyo kulogu okwamanje.
Unobhala weTsholotsho uMelody Ncube uthe angeke akhulume ngokugcweleyo ngabadlali kodwa uyazi ukuthi bakhona abakhangelwe ngumqeqetshi uLizwe Sweswe.
USweswe walile ukutsho okunengi ngoMapuranga kodwa unikeza udletshana lokuthi uzathenga umdlali omutsha ongumgadli, uNdumiso Khanye.
UKhanye kaqalisi ukuligiqa ibhola ngoba wadlalela iCaps United kanye leGunners. Ukhangelelwe ukuthi abambe ziqine ngaphambili kwenkundla.
“Sesilomdlali omutsha uNdumiso Khanye esimthenge kuwindi lekhefu lesizini. Siphenduka kusigaba sesibili, iTsholotsho izabe isiqine saka.
“Ukuzimisela kwabadlali kanye losekelo lwabalandeli yikho okusifikise lapha. Umncintiswano uyaqhubeka kusigaba sesibili seligi yethu, lokho kutsho ukuthi zizaqhubeka ngegiya elifanayo.”
Imidlalo kulimpelaviki:
Namuhlanje: Tsholotsho v ZPC Kariba (White City laku Super Sport 9).
NgoMgqibelo: Chicken Inn v Caps United (Luveve, lakuSupersport 9), Harare City v Flame Lily (Rufaro), FC Platinum v Chapungu (Mandava).
NgeSonto: Whawha v Dongo Sawmill (Ascot), Dynamos v Hwange (Rufaro), Triangle v Highlanders (Gibbo),How Mine v Buffaloes (Luveve, lakuSupersport 9).
Online Reporter