Online Reporter
Zimpapers Sports Hub
IZIMBABWE izaqhuba umncintiswano weWorld Street Children Cricket Tournament (SCCWC) edolobheni lakoBulawayo ngomnyaka ka2027, kutsho uSodolobho wakoBulawayo uDavid Coltart.
UColtart ukhulume lokhu ngesikhathi ephethe umhlangano lengatsha ezitshiyeneyo emahofisini ekhansili ngeviki edluleyo.
Uhlobo lwekhilikithi edlalwa esitaladeni luqhutshwa zinhlanganiso zeStreet Child United leSave the Children, ngenhloso yokuphakamisa abantwana emazweni amanengi, lokubanika ithuba lokuthi bakwazi amalungelo abo.
USodolobho wakoBulawayo uthe umqhudelwano uzaqhutshwa ngesikhathi sinye ilizwe liqhuba imidlalo ye-International Cricket Council World Cup. Imidlalo yenkezo le izaphathwa yiZimbabwe, Namibia leSouth Africa ngoMfumfu langoLwezi ngo-2027
Umncintiswano weWorld Street Children Cricket ucine ukudlalelwa ngo-2023 edolobheni leChennai, e-India njalo uzahlanganisa amaqembu angamatshumi amabili lambili, asuka emazweni alitshumi lasithupha.
Ngaphandle kokudlala ikhilikithi, umqhudelwano lo uzahlanganisela lezokuzithokozisa, umhlangano wamalungelo abantwana abahlala esitaladeni, kufundiswane ngokuphila kuhle.
UColtart uthe sebekhulumisane lenhlanganiso ezinengi ukuthi zincedise ukuze imidlalo le ibeyimpumelelo.
“Besihlangane labaqoqi bemidlalo ye-Street Child Cricket World Cup. Ngatshelwa ukuthi siphumelele ukuthi siphathe imidlalo le lokuthi idolobho lethu lizabe liyingxenye yokuqhuba imidlalo yenkezo yomhlaba.”
