Online Reporter
KULEZI insuku kulendaba ezidumileyo ezokucatsha kwabantwana abancane. Maviki onke uzwa kukhulunywa ngomntwana ocatshileyo mhlawumbe evela esikolo kumbe njalo evela lapho abethunywe khona ngabazali kukanti abanye bacatsha bevela kubangane babo. Umbuzo okhona yikuthi abantwana laba bathathwa ngubani njalo ubasa ngaphi?
Ukucatsha kwabantwana laba kutshengisa ukuba abazali kabakhangeli abantwababo. Kungumlandu womzali wonke wokubakwazi ukuthi umntanakhe lapho akhona uvikelekile ngaso sonke isikhathi.
Umsebenzi womzali yikunanzelela njalo ukuba umntanakhe uphila ngendlela efaneleyo. Umzali kumele njalo azi ukuthi ngaso sonke isikhathi umntanakhe uvikelekile kungakhathalekile ukuba usedlulise iminyaka yokuzalwa engu-18, kumbe kakafiki kulelobanga.
Abazali akumelanga bavumele abantwababo ukuthi kuze kuhlwe bengekho ngekhaya. Umuzi lomuzi ulomthetho wawo ngakho lowomthetho kumele ulandelwe ukuze kube lokuhloniphana ngekhaya hatshi ukuthi omunye lomunye aphile ngendlela afuna ngayo. Lokhu kucina kubangela ukuthi kulelokhaya kucine kungathi kusemahlangeni.
Kwesinye isikhathi uyabona abantwana bedlala phandle kungabi ndaba zalutho. Umbuzo uba yikuthi kambe kulowomuzi kuyabe kulomthetho kumbe labo bantwana bayabe behlala bodwa.
Lokhu kuyingozi njalo kuyimfundiso embi emntwaneni. Abadala bathi umthwentwe uhlaba usamila njalo isigogo sigoqwa sisemanzi kungakho umntwana angavunyelwa ukwenza izinto ezingamakhiyo esakhula uyakhula lakho ngoba vele ikhula lamanono ayo.
Umntwana engavele ajwayele ukuhamba ebusuku esasemcane kutsho ukuthi lokhu kuzahle kube segazini ukuhamba ebusuku aze alinyazwe yizigebengu.
Kungumbono woMthunywa ukuba abazali kumele bafundise abantwababo indlela abafisa bakhule ngayo ukuze nxa sebekhulile bangaphambuki kuleyondlela.
Okwenza ontanga babonakale yonke indawo emabholohweni, emigwaqweni kanye lemakhoneni kusihlwa yikuthi abazali babo bayabekela benze umathanda babhodabhode phandle ntambama.
Kambe umntwana onjalo angaba lekusasa enhle na nxa ephila impilo enje? Angithi isiphetho sakhona yikuthi afane xathu lezigebenga ezicathamela abantu ebusuku.
Bakhona njalo abazali abazitshaya izifuba ngokwekela abantwababo abasanda kungena esikolo behamba bodwa esikolo. Lokhu kungaba yingozi ngoba kungenzakala ukuthi bahlangane lezikliwi zibadlove kumbe bacine bengabonakali.
Kungumbono woMthunywa njalo ukuthi abazali kumele bafundise abantwababo indlela yobuntu ezakwenza bakhule babe ngabantu abalesithunzi emphakathini abaphila kuwo ngoba ikusasa labantwana lisezandleni zabazali babo.
