Online Reporter
KULINDELEKE ukuba agwetshwe ngesonto elizayo owesilisa olahlwe licala lokubulala ngesihluku indodakazi yakhe ngemva kokuthola ukuthi isijola, futhi seyike yalivakatshela isoka layo izikhathi ezinengi.
UBongani Mthembu (41) weNhlanzini Reserve, KwaMbonambi, eMpangeni, ubevele phambi kweNkantolo eNkulu yeMthunzini, lapho avume icala lokubulala indodakazi yakhe, uNkosazana Silindokuhle Mthembu (17), elenzekala mhlaka 22 kuZibandlela 2025.
Evuma icala, uthe weqiwa yintukuthelo ngemva kokuthola ukuthi indodakazi yakhe isijola. Utshele inkundla ukuthi kwathi uma ikuphika lokhu, waziphenyela, wathola iqiniso.
“Ngalunywa indlebe ngumakhelwane wami, engazisa ukuthi indodakazi yami ilobudlelwano lomfana uMzwandi, engingamaziyo isibongo sakhe. Lento yangicasula kakhulu. Ngayibuza indodakazi ngalobu budlelwano, yaphika.
Ngathatha ifoni yayo ngayipequlula, ngathola ukuthi ngempela ilobudlelwano lalumfana.
“Ngayikhuza, ngayicela ukuba imyekele, igxile emsebenzini wesikolo njengoba ibingenzi kahle ezifundweni.
“Savumelana ngalokho, yathembisa ukuthi izomyekela. Ngemva kwesikhathi ngiphinde ngacela ukuba ingivulele ifoni yayo, ngathola ukuthi isaqhubeka lokuthandana lalumfana. Lokho kwangicasula kakhulu, ngaze ngayitshela ukuba ingaphindi iphathe ifoni esikolo,” utsho njalo.
Uthi okwamcasula kakhulu yikubona imiyalezo eyayisefonini yendodakazi yakhe, eyayiveza ukuthi seyake yavakatshela isoka layo.
“Ngemva kokuba ngiphinde ngabheka ifoni yayo, ngathola ukuthi isathandana lalumfana futhi bekukhona lezingxoxo ebeziphakathi kwayo indodakazi labangani bayo bexoxa ngothando lwayo lalumfana.
“Kulezi zingxoxo bekuvela lokuthi indodakazi isike yavakatshela lumfana endlini yakhe izikhathi ezinengi. Lokhu bekuvela enkulumweni ebiphakathi kwayo labangani bayo.
“Uthando lwabo bese luqede umnyaka wonke. Lokhu kwangicasula kakhulu, ngahamba ngayolanda imvubu, ngayitshaya umzimba wonke, yaze wadabuka esiphongweni, sopha kakhulu. Ngayitshaya ngaze ngayiphendula imvubu, ngayitshaya ngesidunu sayo imizuzu engaba mihlanu.
“Sengibona ukuthi iyopha kakhulu, ngayisula igazi. Kungalesi sikhathi lapho ngaqaphela khona ukuthi kayisaphefumuli, yawela ezandleni zami, kwaba yikho engabona ukuthi ngiyibulele indodakazi yami. Sengibona ukuthi ngiyibulele, ngazama ukuphuza umuthi ngenhloso yokuzibulala. Lokhu kwenza ngalaliswa esibhedlela eNgwelezane amasonto amabili.”
Ngemva kokuvuma icala inkantolo, ibe isihlela ukuba agwetshwe phakathi kwalinyanga. U-Advocate Thobile Nsele ubikele umahluleli ukuthi ngosuku lokugwetshwa kukaMthembu, uzocela ukufunda izitatimende zabo bonke abathintekile ngesenzo sakhe.
Unina kamufi uNkosazana Nombulelo Mchunu, ubekhona enkantolo ngesikhathi kuqhubeka icala. Okuqaphelekileyo yikuthi kabazange bakhulume loMthembu. —Ilanga
