Online Reporter
Nkosilathi Sibanda
UMDLALI wamaWarriors uDivine Lunga usezabonakala njalo kumidlalo yeMamelodi Sundowns ngoba leliqembu lidinga ithalenta lakhe njalo uzaqhubeka edlala kulo.
ULunga, ngokutsho kukamaneja wakhe uMike Makaab, uleminyaka emibili eseleyo kukhontileka lakhe laMasandawana.
UMakaab uveze lokhu ngesikhathi ekhuluma lentatheli zeSouth Africa ebulenjini ngoLwesine.
“ISundowns isisebenzise ilungelo layo. Usesele leminyaka emibili kusivumelwano sakhe. Ngibona lokhu kuqakathekile kakhulu ngoba siyazi ukuthi kuSundowns kulokuncintisana okukhulu kwezindawo. Kodwa, kuyabonakala ukuthi iSundowns ihlala idlala kumincintiswo eminengi,” kutsho uMakaab ekhuluma leSoccer Laduma.
“Enye yezinto eziqinise iSundowns eminyakeni edluleyo yikuba leqembu elijulileyo, elilabadlali abanengi abalungiselelwe indawo ezehlukeneyo njalo uDivine udlala indima ebalulekileyo kulokho.”
ULunga ubengadlali kuyo yonke imidlalo yeSundowns, obesekudale imcabango ethile ngekusasa lakhe eqenjini. Kodwa, lapho akade engeniswa khona, ubetshengisa ukuzimisela okukhulu, edlala kuhle, ephakamisa izinga lakhe. Lokhu kumenze wabonakala njengomdlali othembekileyo eqenjini likaMiguel Cardoso.
Ngenxa yalokho, intshantshu zeBetway Premiership ziqinisekisile ukuthi zizaqhubeka zilaye uLunga, osanda kuvela ku-Africa Cup of Nations.
