Online Reporter
Brandon Moyo
KUDINGWA amaqembu amabili azangena kumbango wenkezo yomhlaba kukhilikithi yohlobo lweT20 ka2026, nanko amaChevrons lawo akhangelele ukuthi aphumelele.
Ukuze afike kumidlalo yenkezo yomhlaba, amaChevrons adinga ukuthi anqobe iKenya ngoLwesine kumdlalo wama-qualifers ozaqhutshelwa enkundleni yeTakashinga, eHarare.
Amanye amazwe aphakathi kwalumncintiswano yiNamibia leTanzania. Bekuhlangene amazwe ayisitshiya galombili kodwa sekusele amane. IZimbabwe leNamibia yizo ezihamba phambili ngoba kazikanqotshwa.
Ezizanqoba ngoLwesine, zizadibana ngoMgqibelo.
Imidlalo yeT20 World Cup, izabe iseSri Lanka lase-India.
AmaChevrons aseqhube kakuhle ngokunqoba iTanzania nge-113 runs, yenelisa ukubambelela esiqongweni. Umdlali wakuleli uBrian Bennet (21) utshaye 111 runs, wenza isimanga sokuba ngumdlali omncinyane ukutshaya ama-runs aphezulu kwekhulu, kuyo yonke imihlobo yekhilikithi. Omunye, uBrad Evans, uthole ama-wicket amane, kutshaywe amabhola angu-16.
UBennet ufikise i50 runs kumabhola angu-29, wancedisa ukuba iZimbabwe ithole i-100 runs ngesikhathi se-over yesi-11.
Ukaputeni uSikandar Raza laye ubelomfutho. Ungene watshaya 19 runs, ejikelwe amabhola ayisitshiya galolunye kodwa wakhitshwa nguAlly Kimote kusalindwe ukuthi aqhubeke ngegiya linye.
Ebuzwa ngokukhangela kwabo ukuya kunkezo yomhlaba, uRaza uthe kusasemasinyane ukuthi bazitshele ukuthi bazaphumelela.
“Amazwe esibekwe lawo kumkhankaso we-World Cup lo, engabe edeleleka ngoba kawaqinanga kangako kukhilikithi kodwa, akukho njalo. Akulaqembu elingafuni ukunqoba. Kumele siqaphele,” kutsho lumqeqetshi.
Kusenjalo, abesifazane bakuleli, amaLady Chevrons baphakathi kwemidlalo yeWomen One Day International (WODI) leqembu le-United Arab Emirates (UAE).
Imidlalo iqalise ngempelaviki njalo kuzadlalwa leminye eye-T20 kumalanga alandelayo. Kusiyafika ngoLwesibili emini kuliviki, amaLady Chevrons ebesekhokhela nge 2-1. Imidlalo le isenkundleni yeQueens Sports Club koBulawayo
