Online Reporter
Nkosilathi Sibanda
OMAHLEKISA bakoBulawayo bathembisa ukujabulisa abantu kumkhosi walonyaka oweKwaNtuthu Comedy Fest.
Umkhosi lo uzaqhutshelwa eBulawayo Theatre laseCotton Lounge kusukela mhlaka 30 Mfumfu kusiya ku 1 Lwezi. Kuzabukiswa lamafilumu eZimbabwe Academy of Music.
Kusethulo sabo, abaqoqi bathe kuzaphinda kube lomncintiswano wezikolo kumidlalo yokulingisa, oweMrs Sinkwa Theatre Night. Indikimba ngethi: “The Fourth Quarter”.
“Kuyintokozo ukubika ukuba mhlaka 30 Mfumfu e-Cotton Lounge sizabe siphethe uhlelo lwabomahlekisa olubizwa ngokuthi Dark Knights. Njengesiko lethu lokuphakamisa omahlekisa abatsha, sizakwethula uZibusiso ozabe echinsa ukuma phambili kwenkundla,” kubika abeKwantuthu Comedy Fest.
Nxa kuphela omahlekisa, kubikwa kuzaqhutshwa umncintiswano wokulingisa.
“Lokhu kuzalandelwa yiMrs Sinkwa Theatre Night lapho okuzaba lezikolo ezizancintisa kuMrs Sinkwa Outstanding Theatre Production. Izikolo lezi zigoqela iDominican Convent High Drama Club, St Augustine’s College Drama Club, Riverdale Academy Drama Club, Mandwandwe High Drama Club leNketa High Drama Club. Lokhu kuzakwenzakala eBulawayo Theatre.
“Ngelanga lokucina, kuzabukiswa amafilimu amafitshane eZimbabwe Academy of Music. Umbukiso uzalandelwa ngumcimbi wokuphiwa kwesicoco se-Outstanding Film Production exhaswe yiClicksendnow.”
