admin
SEKUCINE kwaphumela obala okwempahla yembuzi ukuthi umqeqetshi weMamelodi Sundowns uPitso Mosimane uyayithanda iKaizer Chiefs.
Umqeqetshi lo ubesaziwa ngokuthi akulanto enhle ayikhulumayo ngeChiefs kodwa sekuvela ukuthi liqembu akhula elithanda kakhulu.
Lokhu kwenza kube nzima ukukholwa kodwa kuliqiniso
UMosimane wayengumlandeli omkhulu we-Chiefs esasengumfanyana omncane waselokitshini leKagiso.
Umqeqetshi weMamelodi Sundowns lo uthe wakhula ezifela ngaMakhosi.
“Ngakhula ngilandela iKaizer Chiefs. Abantu abakwazi lokho. Angiyizondi iKaizer Chiefs kodwa yisitha sami kumbango wenguqu nje. Yini abalandeli beMamelodi Sundowns babone sengathi u-Ernest Middendorp akabathandi (ngoba laye akakhulumi kahle ngathi). Abantu kumele baqonde ukuthi siyancintisana,” kutsho uMosimane.
UMosimane oleminyaka yokuzalwa engu-55, akakwesabi ukutsho ukuthi Amakhosi anqoba imidlalo ngenxa yamaphutha abonompembe.
Lokho kwenza ukuthi inengi labalandeli beChiefs lingamfuni uMosimane kodwa alazi ukuthi wake waba ngomunye wabo phambilini.
IChiefs leSundowns zibanga ukuphakamisa isicoco se-Absa Premiership.
ISundowns ifuna ukuqhubeka ngokukhonya emuva kokudla isicoco seligi amasizini amabili kulandelana.
Ngakolunye uhlangothi iChiefs izama ukuzakhela udumo emuva kweminyaka emihlanu isehluleka ukuthwala isicoco.
Online Reporter