Online Reporter
Mthabisi Tshuma
UNGABHODA koBulawayo, usuke uye eFilabusi, Gwanda, Lupane, Nkayi laseBeitbridge kuqhunswa ingoma eyodwa, Imali Yes’gweja.
Ingoma kaFab G uMshana kaGogo “isihlanyise” abathandi bezobunandi abanengi emhlubulweni ongezansi yelizwe, okokuthi akuselandawo lapho engaziwa khona.
Phakathi kwengoma eziqhunswe lonyaka, Imali Yes’gweja ihambe phambili endaweni zokuzithokozisa kunye lasemsakazweni.
Loba kuyingoma ethakazelela imisebenzi yabotsheketsha, ithokozisa labantwana kunye labadala.
Ekhuluma lephephandaba likazulu, uFab G uthe ingoma le iguqule impilo yakhe.
Ingoma le, iphinde yakhethwa kumbango wesicoco sePeople’s Choice Award kuBulawayo Arts Awards (BAA).
“Ingoma le ilethe utshintsho olukhulu kimi. Usekelo engilutholileyo luyangimangalisa,” kutsho uFab G.
“Sengibone ukukhula komculo wami, njalo ngifuna ukubona ukuthi uzangifikisa ngaphi ngomnyaka ozayo. Ngiyabonga kubalandeli labo bonke abajabuliswa liculo elimnandi.
“Okunye okuthinta umoya wami yindlela ingoma le ephakame ngayo emisakazweni lakundawo zokuzithokozisa. Iqhunswa endaweni ezinengi kusukela koBulawayo uze uyefika eBeitbridge. Kuyabongeka bantu bakithi.”
Uthe ngomnyaka ozayo uzaphinda futhi.
“Ngosekelo engiluthole kulingoma, ngithembisa okukhulu ngo2026. Usekelo lwenu luyakhuthaza. Njengoba sisamukela umnyaka omutsha, asiqhubekeni sisonke, sikhule sonke, sijabule sonke.”
