marble nkomo
Nkosilathi Sibanda lo-Innocent Kurira
KUYABE kungabizwa ozwayo eMaphisa, eMatabeleland South, ngoMgqibelo lapho iqembu elikhulu, iHighlanders, elizadibana lentshantshu iScottland kunkezo kaZibuse.
Zombili zizangqikilana phambili kwenkulungwane zabantu okukhangelelwe ukuthi bathi gwaqa eMaphisa Ground ngesikhathi ilizwe linanza uZibuse ngaphansi kwendikimba yalonyaka ethi: “Zim @ 46: Ukubambana Lengqubekela phambili kukhangelwe iVision 2030.”
Abalandeli bomdlalo webhola lenyawo ikakhulu abeHighlanders eKezi, Maphisa lakwezinye indawo eziseduzane, sebeveze ukuthokoza okukhulu ngokuthi kungokokuqala iqembu labo abalithandayo elizadlala “ekhaya labo.”
“Lokhu kuyinto enkulu kithi. Besihlala sibukela iHighlanders kumabonakude kumbe sihambe ibanga elide, kodwa liviki bayabuya kithi,” kutsho uJorum Ncube ohlala eKezi.
UCarlos Ndlovu, ongumlandeli omkhulu weBosso eMaphisa, uthe: “Asilamazwi okuchaza injabulo esilayo. IHighlanders liqembu lethu, ukulibona lidlala lapha kuyisibusiso esikhulu emphakathini.”
UDumisani Moyo oweKezi laye uveze ukuthokoza kwakhe wathi umdlalo lo uzaletha ukubambana.
“Abantu bazahlangana ndawonye, sijabule sibukela ibhola. Lokhu kutshengisa ukuthi ibhola liyahlanganisa abantu.”
Omunye umsekeli, uNkosiyazi Dube osebenza esibhedlela seMaphisa, uthe usuku lwangoMgqibelo luzakuba lukhulu empilweni yakhe.
“Ngizabona abadlali engibathandayo ngamehlo ami. Kuyasithokozisa kakhulu njengabantu balapha.”
Ngaphandle kweHighlanders, abalandeli balinde ngabomvu ukubona izingcitshi zeScottland ezifana loKhama Billiat, Peter Muduhwa, uWalter Musona lomfowabo uKnowledge, okuzakwenza umdlalo ube ngowezinga eliphezulu.
“Ukubona uKhama Billiat edlala lapha eMaphisa kuyinto esingazange siyicabange. Lokhu kuzasikhuthaza ukuthi sikhule sithanda ibhola,” kutsho omunye umfana uBekithemba Sibanda ofunda eSt Joseph ongumdlali wenguqu.
Omunye wabaqondisi bezemidlalo yobungane enzikini yeMaphisa uMnumzana Mkhululi Moyo, uthe: “Lokhu kuzavusa ithalenta labantwana, kuphinde kuthuthukise ezemidlalo esigabeni sethu.
Ngakolunye uhlangothi, umdlali weHighlanders u-Andrew Mbeba uthe bajabule kakhulu ukuya dlalela eMaphisa.
“Siyazi ukuthi abalandeli bethu khonale basilindile. Sizimisele ukubanika umdlalo omnandi,” kutsho uMbeba.
Ukaputeni weqembu, uDarlington Mukuli, laye uvumelane loMbeba wathi bazalwela ukunqoba. “Sifuna ukujabulisa abalandeli bethu. Ukudlala phambi kwabo lapha eMaphisa kusinika amandla okuthi sidlalele ukunqoba.”
Online Reporter