adminYiNtatheli kaMthunywa
LOBA izikolo zesabelo seMatabeleland North kusaziwa ukuthi ziyaswela, ithemba lokuphumelela kwalindawo likwezemidlalo yokugijima.Isabelo lesi sibika ukuba ithimu yaso yokugijima eyezikolo zemfundo ye-primary ithembisa ukwenza ngcono lonyaka kumincintiswano yezabelo edolobheni leBindura ngeviki ezayo.
Iziqinti zeMatabeleland North lapho okuphume ithimu zibalisa iBinga, Nkayi, Tsholotsho, uMguza, Hwange, Lupane leBubi.
Isabelo lesi sikhethe abantwana abagijimayo abangamatshumi ayisithupha lanhlanu.
Phakathi kwethimu le, isigaba esibe labantwana abanengi ngeseHwange. IHwange iphinde yabayintshantshu njalo ngokuhluthuna imendulo ezingamatshumi amathathu lambili.
Isigaba seBinga silandele ngemendulo ezingamatshumi amabili lasithupha.
IBubi lonyaka izamile ukwenza okukhanyayo ngokwenyuka kunombolo yokucina. IMguza ibuyele ekhaya iphethe umphini ngemendulo eziyisitshiya galolunye.
Isigaba seBubi leMguza zihlala zisalele muva kwezemidlalo minyaka yonke. Isizatho kubikwa yikusilela kwempahla ephathisa ukulolonga abantwana kanye lokuswela ababalisi abalothando lolwazi lwezemidlalo.
Inhlanganiso yabaphathi bezikolo zePrimary iNational Primary Heads, iNaph, ibambene lenkampani yeNestle iqoqa umncintiswano yokugijima minyaka yonke ngethemu yakuqala.
Umgcinisihlalo weNaph esabelweni seMat North uCharles Ndiweni, uthe isabelo sakhe sizasebenza nzima sifuna ukubalekela inombolo yokucina kulimincintiswano.
“Sizenza ngcono eBindura. Lesi yisithembiso esivela ebantwaneni abazasigijimela. Sikhethe ithimu yabantwana abangu-65 abazagijima, kuthi abanye ngabazasimela kumncintiswano we-physical education.
“Ngilokuthaba ukubika ukuthi lonyaka isigaba seBubi senze ngcono kuleminyaka edluleyo. Lokho kusitshengise ukuba izikolo sezithathela phezulu umdlalo wokugijima. Labafundi sebekhwabitha ezemidlalo ngoba sebenanzelele ukuthi kuyaphileka ngazo.”
“Sikhangelele ukuthi ithimu ekhethiweyo le, iphakamise isabelo seMat North. Okusijabulisayo yikuthi abantwabethu labaqeqetshi babo sebelandela imithetho yokugijima,” kutsho uNdiweni.
UNdiweni ubonge kakhulu ukuphathisa kohlelo lwe-Nestle Healthy Kids ngoba soluguqule indlela izikolo eziphatha ngayo umdlalo wokugijima.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
Online Reporter