Online Reporter
Brandon Moyo
KULEZINSUKU kugcwala phamu enkundleni yeHartsfield ngoba ukubukela umdlalo we-rugby sekujabulisa inengi labantu koBulawayo.
Ngaphandle kokubukela ubungcitshi lethalenta labadlali, abathandi bomdlalo bakholisa lokuchitha isikhathi endaweni eletha ukukhululeka, elokuthula.
Ukwanda kwababukeli be-rugby lokhu kubonakele njalo ngempelaviki edluleyo lapho iqembu leMatabeleland Warriors elitshengise ukuthi lidlala ngcono kuleHighlanders kuBulawayo Metropolitan Rugby Football Board (BMRFB) Archer Clothing Rugby League.
IMatabeleland Warriors yanqoba 89-8. Intshantshu zesizini edluleyo, i-Old Miltonians zidlule zitshelela phezulu kweWestern Suburbs Panthers nge 36-5.
I-Old Miltonians leMatabeleland Warriors kazikanqotshwa lokhe kwaqala isizini kumaviki amane adluleyo.
Ekhuluma ngokunqoba kwabo, umaneja weMatabeleland Warriors uMelford Matarirano uthe ukudlala kwabo kube yisitshengiselo sokuthi babewulungiselele umdlalo.
“Safika emdlalweni silungiselele, sihlose ukunqoba. Siyayihlonipha iHighlanders ngokusinikeza umncintiswano emdlalweni. Ubungalula lumdlalo. Loba kunjalo, abadlali basijabulise ngokunqoba, balandela lokho abakutshelwe ngesikhathi sokulolonga,” kutsho uMatarirano.
Umqeqetshi weHighlanders uSilethokuhle “Slater” Ndlovu uthe banqontshwe ngenxa yokuthi badlalise abadlali abasakhulayo, abangakatholi isikhathi eside bedlala.
“Ukudlala leqembu elikhulu, usebenzisa abadlali abasakhulayo kungumthwalo. Abadlali bethu abajwayelekileyo, abayisithupha bebengekho, yikho sidanele kwabancane abangakaze bafike kusigaba lesi.
“Phezulu kwalokho, ukudlala leqembu elikhulu njengeWarriors kunzima. Ngabe abadlali abathenjiweyo bebekhona, besinganqoba,” kutsho uNdlovu.
Uthe abanye abadlali babo bethukile.
“Bebesesaba. Isikhathi sonke iMatabeleland Warriors ibiqhuba ibhola isukela ku-scrum isiya eceleni kwenkundla, bathole umklomelo. Bebekwenza futhi kuloba yiphi indawo enkundleni. Sehlulwe yikuthi abadlali bethu basakhula, kabajwayelanga ukudlala kulesi isigaba somdlalo. Besikwazi ukuthi kuzakuba nzima kusukela ekuqaleni.”
Umqeqetshi weOMs uParadzai Matsika uthe: “Ngibona impumelelo kulokhu ebesikuvumelana silolonga. Ngeke ngithi kangijabuli. Kodwa, kulenkinga ezintsha ezivelayo okumele sizilungise.”
Enkambeni yePanthers, umqeqetshi uGeorge “Rollo” Mukorera uthe kunengi okumele kulungisiswe eqenjini lakhe.
“Kumele sisebenze labadlali emuva, ikakhulu kuma-breakdowns. Sidlale leqembu elilabadlali abakhulu ngakho kwelizayo kumele sikhangelisise ukulolonga okuzwayo kubadlali bethu be-scrum,” nguMukorera lo.
Kweminye imidlalo, iMahogany Bulls inqoba 17-5 phezulu kweBulldogs. Kusigaba sabesifazane, iHighlanders itshaye iMatabeleland Lions 12-5, iWarriors yanqoba 19-5.
