Online Reporter
Ethel Ncube
KULENDODA yakoBulawayo eMatshamhlophe esele ibonga abaphansi ngemva kokuthunjwa ithathelwe imota ngamadoda amathathu abaleka layo.
Umamangala oleminyaka engu-53 yokuzalwa wayemise imota yakhe phambi kweTshisanyama elinde izisebenzi zakhe ukuba ziqede ngesikhathi esehlelwa ngamashwa la. Kubikwa walandwa ngamadoda amathathu ethwele i-pistol emnyama afika amkhombela ngayo esemoteni bavula bangena emoteni batshayela imota baqonda eNewton West lapho abafika bamfuqela khona phandle kwemota babaleka ngempelaviki.
“Umamangala wayelinde izisebenzi zakhe esemoteni yakhe yohlobo lwe-Mercedez Benz wahlaselwa ngamadoda amathathu amkhombela ngombhobho avula imota angena phakathi qede atshayela imota ahamba laye.
“Bamsetsha bamthathela imali engange-US$100 lomakhalekhukhwini wakhe. Bathe sebeseNewton West bamfuqela phandle kwemota yakhe batshaya phansi lemota. Imota yatholakala ePumula isipontshe amavili ingasela-battery.
Amadoda la amathathu kawazange abanjwe njalo adingwa ngamapholisa.
Intatheli ixhumane lesikhulumi samapholisa koBulawayo uInspector Nomalanga Msebele obike ukuba indaba enjalo isezandleni zamapholisa.
“Indaba yomuntu othathelwe imota yayatholakala ePumula South isibikiwe emapholiseni. Sicela uzulu ongabe elodletshana ngabasolwa laba abathathu asithinte kumbe athinte amapholisa aseduzane laye ukuze babotshwe,” kubika uInsp Msebele.
