Online Reporter
Ethel Ncube
IMBONGI yeSigodini uZulu Mpofu seyaqala inhlelo zokuhambisana lenhlanganiso ezitshiyeneyo ngenhloso yokulwisa ukusetshenziswa kwezidakamizwa.
UZulu uveze ukuba usebenzisana lenhlanganiso yeValley of Hope Rehabilitation Centre ebona ngezidakamizwa lokweluleka abasebenzisa izidakamizwa.
Ekhuluma lephephandaba uZulu uncome kakhulu ukusebenzisana lenhlanganiso le.
“Mina njengembongi ngihamba ngihaya inkondlo endaweni ezitshiyeneyo ngixwayisa lokukhuza abantu abasebenzisa izidakamizwa labazithengisayo ngoba ziyabulala ikusasa lethu. “Khathesi ngisebenzisana lenhlanganiso ye-Valley of Hope Rehabilitation Centre ekoNtuthu. Inhlanganiso le isebenza gadalala ukufundisa abantu ngobubi bokusebenzisa izidakamizwa.
“Njengembongi sengihambe endaweni ezibalisa iBulawayo kunye leGweru ngihamba lenhlanganiso le ngihaya inkondlo ezilesihloko esithi phansi ngezidakamizwa,” kutsho uZulu.
Uqhubekele phambili wethula amazwi okubonga ngokuphakanyiswa yinhlanganiso le.
“Ngethula isibongo esikhulu ku-Valley of Hope Rehabilitation Centre ngokuhamba lami ngihaya inkondlo. Lokhu kuyangiphakamisa njalo kungenza ngaziwe ngabantu abanengi. Ngathola lemisebenzi ngemva kokuhaya inkondlo labo. “Inhlanganiso le iphakamisa abantu kukanti njalo nxa isebenzisa imbongi kumbe abaculi ibenza izinga labo liphakame liyephezulu njalo njengembongi kuyangikhulisa.
“Ngithanda ukukhuthaza ezinye imbongi ezithanda ukuthi zaziwe ukuba zisebenzisane lenhlanganiso ezithile, zigijime ngomsebenzi wazo inhlanganiso lezi ukuze lazo zithole ithuba lokusiza umphakathi ngasikhathi sinye zaziwe.
“Ngomsebenzi wethu kunzima ukuthi wazakale kodwa ngokusebenzisana lenhlanganiso ezithile silakho ukuthi sithole lamathuba amangalisayo,” kuphetha uZulu.
