admin
YiNtatheli kaMthunywa
UMONGAMELI welizwe uMnangagwa usexwayise izizalwane zakuleli ukuthi zingalingeki zibuthane kumkhosi wokugubha iminyaka engu-41 ilizwe lathola uzibuse, mhlaka 18 Mabasa, khepha kufanele esikhundleni salokho abantu kumele balandele imithetho eyabekwa nguHulumende kanye lenhlanganiso yamazwe yezempilakahle eyeWorld Health Organisation yeCovid-19.
Lokhu kwenzakala ngesikhathi inani labantu abahlaselwa ngumkhuhlane lo seliqalile ukukhuphuka elizweni leZimbabwe, lapho okufe abantu abangu-11 kwathi abangu-236 babanjwa umkhuhlane lo kuviki ephelileyo, okulinani eliphezulu kumaviki ayisithupha edluleyo. Kulezikolo phose ezingu-15 elizweni lonke jikelele lapho okutholakale abantwana kanye lababalisi belomkhuhlane lo.
Ekhuluma lentatheli eseState House eHarare ngeSonto, uMongameli uthe loba izizalwane zakuleli zisesimeni sokujabula njengoba umkhosi kazibuse ususeduze, kungaba kubi nxa abantu bengayekethisa imithetho yokuzivikela.
“Loba bengingathanda ukuthi ngibone abantu bakithi bejabula ubusuku lemini benanza inkululeko yethu eyiyo enika abantu bakithi isithunzi kanye lokuzimela, kodwa ngenxa yemithetho yeCovid-19 ngincenga abantu bakithi ukuthi bayekele imihlangano emikhulu. Kabalandele imithetho esiyibekileyo.
“Imithetho yeWHO kumele ilandelwe. Isibonelo khathesi nje sisanda kusuka kukhefu lePhasika inani labantu abahlaselwa ngumkhuhlane lo seliqansa. Ngeke ngikhuthaze abantu ukuthi babuthane bebanengi, kasilandeleni imithetho le sivikele impilo zethu, ezalabo esibathandayo kanye laye wonke jikelele.
“Kubalulekile. Ukuzikholisisa kuzahlala kukhona nxa isikhathi sesiqondile njalo sesikufanele lokho.”
UMongameli uthe uhlelo lokuhlatshwa kwabantu ukuze bavikelwe kubhubhane lolu kanye lempumelelo yakhona sokuhawukelwa ngabanengi, okwenza amazwe kunye lenhlanganiso eziphandle zicele abakhokheli bazo ukuthi bazohlatshwa.
Online Reporter