Siphakeme .Mnindwa
Yintatheli kaMthunywa
OWAYENGUMGCINISIHLALO weqembu leZimbabwe Saints, uLazarus Magwaro (83) udonsele umkakhe uMolly Magwaro (73), emthethwandaba ngoba esithi uyamhlukumeza.
UMolly, ohlala eMorningside koBulawayo, ngoLwesibili umiswe phambili kukaMatshi uAbednico Ndebele esetheswa icala lokuhlukumeza. Umsolwa lo waziswe ukuthi aphenduke emthethwandaba mhlaka 19 Nhlolanja.
Umtshutshisi wodaba, uNkosikazi Josephine Gurazhira uthe isehlakalo sokuhlunyezwa kukamamangala senzakala mhlaka 29 Zibandlela, ngehola lesitshiya galolunye ekuseni. Kubikwa ngaleso sikhathi umsolwa lomamangala babesanda kuthola ukucetshiswa ukuthi bahlale ngokuthula.
Besathola izicebiso lezi, inkundla izwe ukuba uMolly wasukuma watshaya uLazarus ngempama, okwadala ukuthi awele phansi.
Kuthiwa uLazarus wayenxuse abacebisi ababili abavela emahofisini kaHulumende, eMhlahlandlela koBulawayo. Kulandela isehlakalo lesi, kwabikelwa amapholisa, asuka athela uMolly izankosi.
Online Reporter