Online Reporter
Ethel Ncube
KULAMADODA amabili amiswe emthethwandaba weChiredzi azabhadla iminyaka elitshumi esejele ngemva kokuhlasela ehlomile qede adla bayibayi lemali engange-R179 000.
Amadoda la amiswe ngeviki ephelileyo phambi kukamantshi uElijah Sibanda obathole belecala wanquma ukuthi bayehlala ejele iminyaka eyi-12 andubana abephulele iminyaka emibili ngamunye kukhangelelwe ukuba babhadale iR52 000 ekupheleni kukaMabasa kuwonalo umnyaka.
Umtshutshisi uTanyaradzwa Dube uveze ukuba bonke bahlala elizweni leSouth Africa.
Kubikwa mhlaka 28 Mpalakazi kumnyaka ophelileyo, uTimothy Jekero (46), Watson Simango (42) loMike Matose basuka lomamangala eGoli babuya eZimbabwe bamlanda emzini wakhe behlomile.
Bafika babopha umamangala ngentambo zezicathulo bambhaxabula yena kanye lomkakhe uTisalani Baloyi owayezithwele ngalesosikhathi.
UBaloyi uthe esebona sekunzima wakhupha iR67 000 wayipha imigulukudu le. Kubikwa baqhubeka betshaya umkakhe wacina echaza ukuthi kulenye imali eseleyo abayifunayo bacina bebapha R112 000 qede bacela ezinyaweni.
“ULameck Mahome wahamba wayabikela amapholisa wona athi ngelanga elilandelayo abamba uTimothy loWatson sebegada ibhasi sebebuyela eGoli babathola belemali efika R75 790 kanye lomakhalekhukhwini kaBaloyi. Behluleka ukuchaza ukuba imali bayithethe ngaphi bahle babotshwa njalo babelombhobho olemhlamvu ezingu-8.
Omunye owesithathu abahlasela belaye wabaleka kakabanjwa.
