Online Reporter
Ethel Ncube
INHLANGANISO yeLivestock Production isixwayise abalimi abagcina inkomo zochago ngemihlobo yenkomo abangayigcina engabalethela inzuzo.
UMnumzana Cosmas Muzunde onguDairy Officer esabelweni seMatabeleland North ukhuthaze abalimi abagcina inkomo zochago ngemihlobo (breeds) abangayithenga eyiyo engabalethela inzuzo enengi.
Uthe kulemihlobo yenkomo zochago etshiyeneyo njalo bakhuthaza abalimi abasesabelweni seMatabeleland ukuthi bafuye umhlobo we-Holstein.
“Silemihlobo etshiyeneyo yenkomo zochago egoqela ama-Jersey, Red Dane, Guernsey, Holstein, Simmental lama Aryshire.
“Sikhuthaza abalimi ukuthi bagcine amaHolstein ngoba ngumhlobo wenkomo omkhulu njalo ungabenza bathole inzuzo ephezulu,” kutsho uMnu Muzunde.
Uthe kulendlela ezibonakala ngazo ezigoqela umbala, indlela ezehlisa ngayo lesisindo.
“Ama-Holstein alombala omhlophe lomnyama, njalo aba lesisindo esingaba yi-550 kusiya ku-600kg.
“Okunye njalo ama-Holstein ayehlisa uchago olungaba yi-25 kusiya ku-40 litres ngelanga. Sikhuthaza abalimi ukuthi balime ukudla kwezifuyo zabo ngoba umhlobo lo wezifuyo uyadla kakhulu,” kutsho uMnu Muzunde.
Uthe amaHolstein awaqinanga njalo ayaphangisa ukubanjwa yimikhuhlane.
“Ama-Holstein awaqinanga njalo ayaphangisa ukubanjwa yimikhuhlane. Ama-Holstein awafuni kuhlala kakhulu elangeni njalo sikhuthaza abalimi ukuthi bawenzele umthunzi ukuze engatshiswa lilanga,” kutsho uMnu Muzunde.
Uthe abalimi bengawagcina amaHolstein okweminyaka engu-15.
“Abalimi bengagcina amaHolstein okweminyaka engu-15 kuphela ngoba azala amathole angu-15 impilo yawo yonke njalo i-butterfat yayo iyi 3,2 percent,” kuphetha uMnu Muzunde.
