Vusumuzi Dube
YiNtatheli kaMthunywa
KULENDODA yeChipinge etshiye izakhamizi zitshwaqe umzimba kulandela ukubhaxabula unina.
Indoda le, eleminyaka engu-35 yokuzalwa yesiqintini seMakiwa ngaphansi kwenduna uGarahwa izithole isisenkingeni kulandela ukutshaya unina ngezibhakela yabuye yambhaxabula ngogodo kulandela ukuxabana phakathi kobusuku.
Ngokutsho kweNational Prosecuting Authority of Zimbabwe (NPAZ), isehlakalo lesi senzakale mhlaka 20 Ntulikazi ngehola lika 10 ebusuku. Indoda le engaqanjwanga yafika endlini yaxabana lelinye ilunga lemuli. Unina uthe ezama ukuba akhulumisane labo, wahle wamphendukela wavukela yena ubhova.
“Wamtshaya ngezibhakela ebusweni kunye lekhanda, wadobha ugodo wambhaxabula ngalo inyawo,” kutsho isitatimende seNPAZ. Umamangala waba lamanxeba wayakwelatshwa esibhedlela.
Unina kamsolwa wayamangala emapholiseni ahle ambopha.
Umantshi womthethwandaba weChipinge uqume ukuthi umsolwa ayepika inyanga ezingu-16 ejele, abuye wazilengisa kukhangelelwe ukuba asebenzele umphakathi amahola angu-420.
EsiNtwini, kuyazila ukufaka umzali wakho isandla khona ukutshaya umama kufana xathu lokuzifakela umnyama empilweni yakho.
Bongani Ndlovu