admin
Nkosilathi Sibanda
Kuqale ngoKhama Billiat ekuseni, kweza udaba lokuthi iSports and Recreation Commission (SRC) isidilize ibhodi yeZifa, kwacina ngabonompembe emini yantambama bekhalala imidlalo.
Beziselekana, umangoye uyasola.
Umdlali othenjiweyo wakuleli uKhama Billiat, wethuse abalandeli bebhola ngesikhathi ememezela ukuthi useyekela ukudlala ibhola lamazwe.
Kwenzakale ngoLwesibili ukuthi kumiswe yonke imidlalo yenguqu kuleli kulandela isimemezelo seSRC ebike ukuba isihlalise phansi wonke amalunga ebhodi yenhlanganiso yeZifa.
UBilliat ubengukaputeni wamaWarriors kumdlalo weEthiopia ngeSonto, ophethe ungutshiki lobhanqa ka 1-1.
Isizatho sokutshiya kwakhe ukudlalela isizwe asizwakali ngoba nanko kazange athande ukuchaza okunengi.
Bazamile abalandeli bakhe ukuthi bambuze emakhasini obulembu kodwa kwehlule. Kumidlalo emithathu, ngaphansi komqeqetshi uNorman Mapeza, uBilliat ubengowokuqala ukukhitshwa.
UMthunywa uthole udletshana lokuba ngesikhathi esenkambeni yokulolonga lamaWarriors uBilliat wayengasuthiseki. Kubikwa ukungezwani kuhle labanye kwengezwa yisiphatho esibi esasivela kunkokheli zeZifa.
Uphenyo oluqalwe liphephandaba likazulu luveze ukuba bekungela kuzwisisana phakathi kwabadlali lenhlanganiso yeZifa.
Ukutshiya kwakhe amaWarriors ngoLwesibili ngemva komkhankaso wenkezo yoMhlaba kuyasolisa.
Nangu umdlali obethenjiwe ukuthi ayekhokhela ilizwe mhla lihlasela eCameroon kumqhudelwano weAfrica Cup of Nations ngoZibandlela ka-2022, kodwa ucabange ukufulathela abakibo.
Akuhlalanga ngitsho lamahola amangaki, kwatheleka ezinye indaba ukuthi inhlanganiso yeSRC isimise umsebenzi ibhodi yeZifa. Kuyaziwa, akufihlwa ukuba inhlanganiso zombili lezi aziboni ngaso linye.
Inhlanganiso ebona ngezemidlalo le iveze phakathi kwezinye izizatho zokungaphathi kuhle kanye lokuswelakala kwecala lokusebenzisa imali kazulu, ukuhlukuluzwa kwabonompempe besifazana okwenzakalayo kunhlanganiso yeZifa, ukwehluleka ukulungisisa ukungalingani ngokobulili okuphathelane lesiphatho samaqembu esizwe abesifazana, amathimu esizwe ahambela phandle kweZimbabwe.
Ukumiswa komsebenzi kweZifa kutsho ukuba ilizwe lingavalelwa ithuba lokuthi liyencintisa kumidlalo ye-Afcon, Cosafa layo yonke ekhona edibanisa amazwe.
Online Reporter