Online Reporter
Langalakhe Mabena
UNobhala Omkhulu kugatsha lweSport, Recreation, Arts and Culture uNicholas Moyo usekhuthaze uzulu ukuthi abuye ngobunengi enkundleni yeBarbourfields lamuhla kumkhosi wokuvulwa ngokusemthethweni kwenyanga yokunanza amasiko, iCulture Month.
UMoyo uthe umkhosi lo uqakathekile ngoba ukhumbuza uzulu ngokuqakatheka kwamasiko lokuzigqaja ngokuba yizizalwane zeZimbabwe.
Imikhosi le izakhokhelwa nguMongameli uEmmerson Mnangagwa yena ozabe enguMhlonitshwa omkhulu.
Umbuthano wakoBulawayo lo uzatshengisa ukwehlukana kwamasiko eZimbabwe ngokuculwa kwengoma, imigido, ukudla kwesiNtu, impahla zomdabu lembukiso yamasiko.
UMoyo uthe iCulture Month kayisiyo nje inyanga yokuzithokozisa kuphela kodwa yindlela yokubuyisela abantu emasikweni.
“Imibuthano enjengale iqakathekile ngoba isikhumbuza ukuthi singobani njengabantu beZimbabwe. Amasiko ethu ayiwo asenza sizigqaje, asichaze njalo aligugu lethu, ngakho kuqakathekile ukuthi abantu bahlangane bawalondoloze,” kutsho uMoyo.
