Online Reporter
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Abelaphi abalezinyoka
Abelaphi abalezinyoka bayimihlobo etshiyeneyo. Inyoka zonke ziziveza kulowo ezifuna ukuphuma kuye ngendlela ezinengi. Nanzi ezinye indlela ezijayelekileyo esiNtwini.
Ngamaphupho — Umuntu uthi engalala aphuphe etshengiswa izihlahla zokwelapha, atshengiswe lendawo lapha azazithola khona. Ukuphupha lokhu kuqhubeka kuze kufike lapho aziphupha khona emini libalele. Isiphetho, abadala bayadingisisa imbangela, kuqaliswe-ke umsebenzi wokuthi afundiswe ukwelapha ngendlela yakhona.
Ukugula — Umuntu uhlatshwa ngumkhuhlane ungaze wambulala kodwa wehlule ukwelapheka. Kudingwe izinyanga, kuyiwe esibhedlela, kodwa kwehlule kuze kuthi inyanga ebonayo sibili iliqambe idlozi, umuntu lowo aqalise ukuba ngcono. Sekuzalungiswa ukuthi izinyanga lezo ziphume.
Ukuvaleka inzalo — Kuyenzeka ukuthi idlozi liphuze ukuphuma umuntu aze ayekwenda, mhlawumbe afike azale umntwana wokuqala acine ngaye. Esethi kelamise kwehlule. Badinge imbangela bayiswele, kuze kuthi inyanga ebonayo iliqambe. Lingalungiswa idlozi umuntu lowo avuleke ukuzala engazange aphiwe zihlahla.
Kwesinye isikhathi uma lowo muntu eyindoda, ehluleke ukuthatha, loba athathe umfazi aphinde amxotshe, athathe omunye kube ngesakuqala. Kuze kuphele selibanjiwe idlozi.
Zonke lezi zindlela idlozi elaliziveza ngazo kulowo eselimkhethile, eselifuna enze lokho elimkhethele khona. Kwakunzima ukuthi umuntu ale ukuthi idlozi lelo liphume kuye enze lokho okufunwa lidlozi. Kodwa abanye babezama ukulilahlisa idlozi lelo ngoba bengafuni ukwenza elikufunayo. Kwakukulutshwane ukuthi baphumelele kulokho.
Ukuthwasiswa — Nxa selibanjiwe idlozi, lowo eliphume kuye evuma ukwenza lokho okuzaqanjwa idlozi sekumele kuqaliswe umsebenzi wokulenza liphume egcekeni.
Indlela yokwenza lokho kuthiwa yikuthwasisa, umuntu lowo owenziwa lokho kuthiwa lithwasa. Ukuthwasiswa komuntu kuya ngokuthi idlozi eliphume kuye ngelinjani.
Khathesi sizakhangela ukuthwasiswa kwamadlozi atshiyeneyo. Isangoma: Ngaphandle kokugulisa, umuntu ophunywa yibungoma ubonakala ngokwenza izinto ezingajayelekanga.
Kwesinye isikhathi usuka aqonde egangeni abuye esethwele inhlathu afike ayibulalele phakathi kwabantu.
Uma selibanjiwe-ke idlozi lelo, umnikazimuzi uhlanganisa umuzi wakhe abikele abaphansi ngokubika kumnini sibaya esithi: “Lapha ekhaya sesibambe umtwana ohlutshwa zinyoka.
Kasizazi kumbe ngeza-kwenu kumbe ngeziza ngabomama kumbe ogogo kodwa sithanda zivele inyoka lezi. Sizabamba amabele ngosuku olungaka(luqanjwe usuku)”.
