Online Reporter
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Ukubuyela ekhaya ngemva kokuthwasa
Silokhe siqhubeka ngokukhangela udaba lokubuyela ekhaya ngemuva kokuthwasa. Sizwe okunengi ngesangoma sona esivumisayo. Sizwile njalo ukuthi isangoma sibe ngesivumisayo kuphela. Nxa kunjalo-ke sinavumisa sibe sesilayela abantu lapho abangelatshwa khona.
Isangoma sona kuthiwa sembatha amalembu amhlophe lobuhlalu obumhlophe. Sona kasitshayelwa ngungu. Sizwile njalo ukuthi izangoma zendulo zazingafuni ukubona isidumbu, ngakho umuntu oyisangoma kayi lapho okufiwe khona, kayi emngcwabeni.
Kuthi nxa kugulwa ekhaya lapha babona ngaso isangoma ukuthi umkhuhlane lo uza lemfa ngoba sihle sisuke sihambe nxa lowo ogulayo esezakufa. Lanxa kufe umuntu ongowakhe umuntu oyisangoma kasondeli. Nxa isangoma singafika lapho okulesidumbu khona sibanjwa ngumoya seqe kumbe umuntu wakhona enze angani ufuna ukufa.
Isanuse: Isanuse ngumuntu obona ngomoya. Zithi zingaphuma izinyoka zomuntu lowo kuvele ukuthi yisanuse kudingwe umuntu wokumlungisa. Isanuse kasithwasiswa kodwa siyakwezwa umoya. Kulemithi yakhona okukhwezwa ngayo umoya waso ukuze siphembele ngamandla. Isanuse sisebenza ngomoya kuphela.
Isanuse kasivumisi kodwa siyahlahlula ngomoya waso lo sibone konke okwadlulayo, okukhona lokuzayo. Isanuse sona sibona singakhulekwanga. Ngalokho-ke isanuse sona ngokwaso kaselaphi kodwa siyahlahlula kuphela silayele umuntu lapho angathola khona uncedo.
Kodwa njengoba kungandanga ukuthi inyoka iphume ibenye laso isanuse singaba lenyoka eyelaphayo silayele umuntu imithi sicine silayeka laso.
Isanuse silomuntu waso osigcinayo onguye esimlayelayo ukuba kuyini amele akwenze. Phela konke esikwenza sifikelwe ngumoya asize sakwazi nxa umoya lowo usuhambile ngakho lowo muntu nguye osala eselandisa konke okuthiwe kumele kwenziwe.
Iwosana: Iwosana lidlozi eligidela izulu. Iwosana kayelaphi njalo kayithwaseli enkundleni. Iyaphehlwa iwosana njalo lowo oyiphehlelayo uyilanda emzini wayo. Kuthi lingaphuma idlozi kubonakale ukuthi yiwosana abizwe ozayiphehlela afike abalayele abalapha ekhaya konke okumele bakwenze.
Kuzakuthi mhla wotshwala umayiphehlela aze ngekhaya afike angene endlini ehlabela. Kuzakuthi sekunjalo baqalise ukutshaya ingungu. Kuba lodiwo olusethundu. Lowo oyiphehlelayo usezayiphehlela isithundu ekhanda. Ukwenza konke lokhu kubiza idlozi. Nxa selifikile liyaqamba elikufunayo njalo kumele kwenziwe khonokho elikuqambileyo likhungwe.
Konke lokhu kungenziwa iyabe isithwasile iwosana.
