Online Reporter
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Lamhlanje siqhubeka ngodaba lokuthi kufikwa njani enyangeni. Qaphela ukuthi lokhu sikuqale ngeviki edlulileyo.Abafikayo befuna ukutshayelwa amathambo bafika bathi: “Sizocela amathambo”.
Yena-ke utshayela ngaphandle komuzi enkundleni yakhe. Uma sebetsho njalo usezaphuma aqonde enkundleni yakhe. Umtshayi wamathambo utshaya ekhuluma elokhu ewaqamba ngamabizo esitsho lokho akubonayo.
Izaqalisa ukutshayela umuntu amathambo zithi lowo ozetshayelwa aqale awabuthe amathambo la awaphathe ngezandla abikele amadlozi akhe ukuthi amvulele indlela.
Abatshaya amathambo labo bayaphupha, inyoka zabo zibatshengise okufunekayo kuthi abantu abezatshaya sebefika isivele yabalungisela. Njengoba inyanga etshaya amathambo isenza lokhu ngoba iledlozi nxa isikhuluma lamathambo ikhuluma ngolimi lwalelo dlozi. Lokhu yikho okwenziwa yibo bonke abantu abalezinyoka.
Uma idlozi selifikile yilo elikhulumayo ngakho nxa ulimi olukhulunywa lidlozi lutshiyene lokukhulunywa ngumuntu lowo uma ezihlalele, umuntu lowo ukhuluma ulimi lwedlozi nxa idlozi selifikile lithi lingahamba idlozi avele angaze alwazi lolo limi abe elukhuluma.
Inyanga zamathambo ziyafana labo abantu abalezinyoka, kaziphunywa yinyoka ibenye. Ezinengi zakhona zitshaya amathambo ziphinde ziphe lemithi yokwelapha imikhuhlane yakhona. Kodwa kumele kutshiwo ukuthi esiNtwini inyanga zazithanda ukuphana izigulane.
Inyanga yamathambo ithi ingawatshaya ibone uhlupho lapho olukhona ibe isilayela umuntu lowo kwezinye indawo lapho azekwelatshwa khona.
Ihle imtshele ukuthi nxa esefika kuleyo nyanga ahle atsho ukuthi uthunyelwe lapho nguzibani ukuthi azephiwa izihlahla zomkhuhlane
Imikhuba ephathelene labalezinyoka: EsiNtwini abantu abalezinyoka ngabantu abangenzi intando yabo kodwa kumele benze lokho okufunwa zinyoka ezikubo. Loba kambe lezonyoka zaziphiwe imithetho kwesinye isikhathi kulezinto ezithize okumele bazenze ngendlela efuna lokho.
Ezinye izinyoka zizondana lezidumbu. Umuntu wakhona uvele kasondeli lapho okulesidumbu khona. Nxa ogulayo eseseduze lokufa lowo muntu uphongusuka ahambe. Abantu abalezinyoka kabaphathi izihlahla kumbe ukutshaya amathambo, kumbe ukuhlahlula ngelimnyama. Isikhathi lapho inyanga ifile (inyanga le esiyibona phezulu).
Ngakho umuntu nxa ezakuya kubo uqala akhangele ukuthi inyanga ikhona yini. Nxa ifile kumele alinde ithwase kuqala. Kukhona njalo ukudla okuzilwa zinyoka ezithile. Izinyoka ezinengi kazidli imvu kanti njalo zikhona ezinye ezingadli inkukhu. Phose zonke izinyoka kazidli ingulube.
