Online Reporter
Bhekimpilo Tshalibe
ABABONA ngempilakahle yezifuyo sebexwayise abafuye inkomo ukuthi bananzelele izifuyo zabo zingahlaselwa ngumkhuhlane we-Redwater ngoba ulakho ukutshabalalisa isibaya.
UDokotela Maria Jakarasi ongudokotela wezifuyo eVeterinary Services koBulawayo uthe abalimi abafuye inkomo kumele bazinanzelele zingahlaselwa ngumkhuhlane weRedwater ngoba uyingozi kumpilakahle yazo.
“Umkhuhlane weRedwater ubangelwa yisibungwana esibizwa ngokuthi yi-babesiosis njalo umemethekiswa yimikhaza.
Uthe umkhuhlane lo ujayele ukuhlasela inkomo ngesikhathi sezulu.
Uqhubekele phambili wathi umkhuhlane lo ulendlela obonakala ngayo ezifuyweni.
“Isifuyo esesihlaselwe ngumkhuhlane weRedwater siba lomkhuhlane woqhuqho, siba legazi elilutshwana, siswele amandla futhi sehle lesisindo saso, siyahuda sibuye siphefumule nzima,” kulandisa uDkt Jakarasi.
Uthe kulendlela abalimi abangazisebenzisa ukuze bavikele izifuyo zabo emkhuhlaneni we-Redwater.
“Sikhuthaza abalimi ukuthi badibhise inkomo zabo kanye ngeviki nxa kuyisikhathi sezulu njalo ngesikhathi sokutshisa sibakhuthaza ukuthi bezidibhise kanye ngemva kwamaviki amabili ukuze bebulale imikhaza ebuya lemikhuhlane,” kutsho uDkt Jakarasi.
Uphethe ngokuthi umkhuhlane we-Redwater uyelapheka.
“Umlimi engananzelela ukuthi isifuyo sakhe sesihlaselwe ngumkhuhlane lo, simkhuthaza ukuthi asinike umuthi okuthiwa yi-imidocarb,” kuphetha uDkt Jakarasi.
