Online Reporter
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Umbuyiso
Ngaphansi kwesihloko umbuyiso ngamafitshane sizakhangela ngokungenwa komfelwakazi. Abalandeli balamakhasi bazakhumbula ukuthi sake sayiphanda lindaba saxoxa kabanzi ngezinto ezithile ezinjengokuthi kwenziwani esiNtwini nxa kubuyiswa, ngubani obuyiswayo njalonjalo.
Ukungenwa komfelokazi —Kwakungena endlini abosendo kuphela, besekusithi lowo owabayo abesetshela umphakathi lowo osendlini ukuthi uSibani uzagcina okaSibani. Bayabe sebevele bahlangana abadala bosendo bakhuluma. Abesintwana labantwana babetshelwa into esikhulunywe yaqedwa.
Owesifazana wayelemvumo yokwala ukungenwa. Owayengafuni ukungenwa, efuna ukuzibuyelela ngakibo ayezikhombela kutsha, wayethathelwa impahla labantwana. Ingubo lokunye wayengakuthathelwa. Owayevuma ukungenwa laye wayelemvumo yokuzikhethela umuntu wokumngena, nxa wayengafuni ukungenwa yilowo ayemkhethelwe ngabomuzi.
Lowayeseluphele loba esemunywana kodwa engafuni ukungenwa njalo engafuni ukutshiya abantwabakhe wayekutsho lokhu ngendlela yakhona. Oseluphele nxa bengafisi ukumtshela laye nxa kwakuthiwa kangenwe, besazi ukuthi uzakwala. Abantu abafanani, abanye babengaze bala loba beluphele.
Akula ukuthi umuntu wesifazana azikhethele umuntu afisa ukuthi amgcine. Labo abesilisa abayabe befuna ukungena abafazi besihlobo sabo esifileyo, babahle batshengise ngokuba lusizo kibo abafelwakazi besazilile. Bazabe bebenzela lokhu lalokhuya kodwa labo abesifazana bayabe besazi ingqondo zabo loba bangaze bazenze abantu abalungileyo.
Babezikhethela ongalahlupho.
Ukukhethwa komuntu ozakungena kwakusenziwa kanje: Kwakuthi abosendo sebethe gwaqa endlini bonke labo mama laba abazangenwa kulethwe umkhonto kababa lo ofileyo. Kuzakuthi umama okhethelwe umuntu angamfuniyo ukuthi kamngene anikwe umkhonto ukuthi awuqhubele lowo amfunayo. Lakanye uzawuthatha amqhubele.
Owesilisa loba engafuni kwakungelula ukuthi ale. Wayewuthatha, ekuhlaleni atshengise ngezenzo ukuthi yena kafuni. Kuzakuthi lowo ongafuni kungenwe abesethatha umkhonto awubeke phansi. Sebezabona abomuzi ukuthi umama lo utsho ukuthi ufuna ukusuka. Nxa elomntwana osesemncinyane bazamekela ahambe laye baze bayemthatha esekhulile.
Nxa umama esuka lapha uya ngakibo, usezakuthi esesiya nganxanye esuka ngakibo. Nxa esuka lomntwana omncinyane usezamtshiya lapho ngakibo esesiya kwenda. Abakibo kamntwana bazamthatha angaba leminyaka emihlanu kumbe ukudlula. Umuntu osekhulile osengagcinwa ngabantwabakhe, uzathatha umkhonto awunike indodana yakhe.
Ngalokhu uyabe esitsho ukuthi uzahlala lapha ekhaya agcine abantwabakhe nxa bengakakhuli.
