Online Reporter
Yintatheli kaMthunywa
KULENDODA yeMutare ebiphila njengesigqili emtshadweni wayo okweminyaka elitshumi lantathu, ihlukunyezwa njalo lokuhlutshwa ngumkayo.
Evela phambi kwenkundla yomphakathi yenduna uMutasa ngeviki ephelileyo, uJulius Mtetwa uthe umkakhe, uCaroline Manyuchi, ubemhlukumeza emzimbeni lasemizweni kusukela ngelanga lokuqala lomtshado wabo.
UMtetwa uthe umtshado wakhe mubi kakhulu, wengezelela ngokuthi umkakhe wake watholwa elecala wabotshwa kanengi ngenxa yokumhlukumeza.
“Wake watholwa elecala wagwetshwa ngenxa yokungihlukuluza kwakhe okungapheliyo. Sathi sesehlukana, wangixotsha endlini yami ngavuma.
“Kuminyaka emibili edluleyo, bengihlala kwenye indawo. Khathesi sengihlutshwa yikungabi lamandla ecansini. Angilali lomuntu, njalo kangazi ukuthi ngithwele luphi,” utsho njalo.
Wengezelele ngokuthi umkakhe wayedume emphakathini wabo ngokutshontsha amadoda abanye abesifazane.
“Umakhelwane okhathazekileyo weza lapho engihlala khona, wangitshela ukuthi utshontsha amadoda abanye abesifazane. Ngaya khona ngamfica embhedeni lendoda okuthiwa nguBismarck,” utsho njalo.
UMtetwa uthe umkakhe wasabela ngobudlwangudlwangu lapho emangala, watshabalalisa amaphepha akhe lomazisi.
“Udabule lezincwadi zami zobufakazi bokuthi ngifundile, lokutshayela. Ngaya kuyise, ngamtshela ukuthi kangisamfuni umntanakhe,” kutsho uMtetwa.
Uthe uManyuchi wayemzonda ngenxa yokuguga kwakhe, wathi ufuna indoda esencane.
“Wangitshela ukuthi ngiyaguga njalo khathesi ufuna indoda entsha. Uguqule ikhaya lami laba yisitolo okunathwa khona utshwala. Kangisazi ukuthi ngenzeni, yikho nje ngize enkundleni le,” kutsho uMtetwa enkundleni.
UMtetwa uveze lokuthi ngemva kokumnika imali yesehlukaniso, uManyuchi wasisebenzisa ukuthenga igilosa kulokuthi avume ukwehlukana.
Lanxa kunjalo, uManyuchi uphike izinsolo, wathi umkakhe uqamba amanga ngenhloso yokungcolisa isithunzi sakhe.
“Konke lokhu ngamanga. Amadoda ahlala endlini yami ngomakorokoza ahlala khona labomkabo. Kabazisithandwa zami. Kangizange ngimbophe, njalo sekuyiminyaka emithathu esuka ekhaya. Kangazi ukuthi uhlalaphi,” utshilo.
Ugomelele ekuthini kayisuye obangela ukuthi angabi lamandla emacansini, waphikelela ekuthini ube lokhu egxile ekunakekeleni abantwana babo abathathu kusukela behlukene.
Umtshado walababantu oleminyaka elitshumi lantathu, owake wakhonzwa linengi labantu usulihlazo emphakathini, okutshiya umphakathi wehlukene ngokuthi ngubani okhuluma iqiniso.
Ngesikhathi kulalelwa icala, induna uMutasa yeluleke uMtetwa ukuthi adinge ukwelatshwa ezibhedlela ngenxa yobunzima bendaba yakhe, kulokucabanga ukuthi uthwele.
“Kumele uye esibhedlela uyedinga ukwelatshwa ngesimo sakho. Ungathathi izinqumo ungakatholi ukuthi yini inkinga,” kutsho induna.
Ukhuthaze uManyuchi ukuthi acabangele ukufaka isicelo sokuthi abantwana babo abathathu banakekelwe nxa ekuthola kunzima ukubondla eyedwa.
“Nxa lisingasekho ndawonye, lapho-ke udaba lokunakekelwa kumele luqhutshwe ngendlela efaneleyo ukuze abantwana bangahlupheki,” kutsho induna uMutasa.
Induna iqhubekele phambili ixwayisa laba ababili ukuthi bekele ukuthethisana, njalo bavumele izinhlelo zomthetho lesintu ukuthi zisingathe izinqubo zesehlukaniso sazo ngokuthula.
