Online Reporter
UMLINGISI obelingisa indawo kaDintle Nyathi emdlalweni waku-etv osanda kuphela iScandal!, uMapaseka “Pasi” Koetle — ohlale iminyaka engu-13 kulo mdlalo, useveze ukuthi amava okulingisa kulo mdlalo omakhele igama, kumsize ukucijela okukhulu kule ndima.
UMapaseka (37) waseBloemfontein, eFree State, utsho njalo exoxa leSolezwe mayelana lendawo kaKea Maponya, ayilingisa emdlalweni omutsha wakuMzansi Magic othi Nyala O, okhonjiswa kusuka ngoMvulo kusiya ngoLwesithathu ngo-7 ebusuku.
“Le minyaka engu-13 ngikuScandal! ingisize ngamava amakhulu esenginawo ngale ndima, futhi kungisize langokucijela ukuthi uma sekufika la mathuba afuze leli esengilithole manje, engibona lizoqhubeka lingikhulise kubhekwe phambili,” utsho kanje.
Elandisa ngendawo kaKea ayilingisa kuNyala O, uMapaseka uthe leli thuba lifike kuyena ngesikhathi esihle njengoba liqondane sekuvele sekusemaphethelweni omdlalo iScandal, asebheke ukuziveza ngendlela ehlukile ebantwini abakhonze imidlalo yethelevishini.
“Ngathi ngibona i-script salo mdlalo ngayithanda kakhulu le ndawo ngoba inezingxenye ezinengi ezizavula abantu amehlo ngezimo ezihlukile.
“UKea ungunkosikazi futhi ongumama wengane esisesigabeni sokukhula, okubonakala ngathi konke okwakhe kuhamba kahle, kodwa ngaphezu kwalokho ubhekene nezimo zezothando, umtshado, ukuba ngumama lezinselelo zokuzama ukuhlanganisa lokumisa umndeni wakhe,” kutsho uMapaseka.
“Okunye engikuthanda ngoKea yikuthi ulezinto ezinengi abantu abanengi ezizobathinta, futhi ngikholwa ukuthi banengi abesifazane abazibona uqobo ohambweni lwakhe, esengibheke ngabomvu ukugxila kukhona ngokugcweleyo,” utsho kanje.
Mayelana lezinhlelo zengomuso, uthe ukulingisa kuzohlale kuhamba phambili kuye, kodwa futhi ubheke lokuqhubeka axoxe izindaba ezizothinta abantu — okungaba ngakho ukulingisa lokukhiqiza imidlalo yezokulingisa ethi yena, ebe kukhulisa i-podcast yakhe yakuYouTube iMommy Diaries By Pasi, elabalandeli abangaphezu kwa-120 000.
Abanye abalingisi abazogqama kuNyala O woTsholofelo Matshaba (Mapula), Cindy Mahlangu (Lerato), Motlatsi Mafatshe (Rhami Maponya), Aubrey Mmakola (Ernest), Amanda Seome (Pretty), Slindile Nodangala (Gabisile) lo-Elizabeth Serunye (Getrude).-Ubulembu
