Online Reporter
Ethel Ncube
UMHLABELELI we-rhumba uGodolude useveze ukuba usenelise iminyaka engu-15 elokhu ebambelele kwezomculo ejabulisa uzulu.
Ubike ukuba lonyaka uzakwenza idili elikhulu ethakazelela iminyaka engu-15 elokhu ephakathi kwezomculo.
Ekhuluma lentatheli ngamacebo alawo ka2026 ubike ukuba ukhangelele ukwenza izinto ezitshiyeneyo.
“Umnyaka ka-2026 ngikhangelele ukuba ngithakazelele iminyaka engu-15 ngilokhu ngisemculweni kungakho-ke ngizakwenza idili elikhulu. Idili leli ngizalihlanganisa lelanga lokuzalwa kwami ngikwenze kanye.
Okunye lonyaka ngikhangelele ukuba ngenze ividiyo yengoma yami ephume ngo2025 ethi ‘Isibindi selifa’ ingoma le ithakazelelwa ngabantu abanengi kungakho yikho ngikhethe yona ukuba ngenze ividiyo yengoma yakhona ukuze ngijabulise abalandeli bami,” kutsho uGodo.
Uqhubekele phambili eveza ukuba lonyaka kukhona okutsha azakuphekela abalandeli bakhe.
“Ngikhangelele ukuba lonyaka lakho ngipheke elinye idlalade lengoma ze-rhumba elitsha. Idlalade leli lizakwethulwa eBotswana, South Africa ngiphinde njalo ngibuye ngilethule ekhaya eZimbabwe.
Okunye engizakwenzela abalandeli bami yikubhoda iMatabeleland yonke ngize ngiyefika lasesigodlweni eHarare ngitshaya i-rhumba ngicabanga ukuba abanengi sizahlangana endaweni elihlala kuzo nxa ngiyabe ngisiya endaweni ethile ngiyafaka kunkudla zami zokuxhumana, ungasaleli emuva buya uzibonele uGodo ngamehlo nxa engafika endaweni yakho lapho ohlala khona.
Okunye ngethula isibongo ngokuthola imisebenzi ngesikhathi sekhefu ngithi kubalandeli bami lingadinwa lakusasa, ngilifisela umnyaka omuhle ka-2026 iNkosi ilenzele kakhe,” kuphetha uGodo.
