Online Reporter
YiNtatheli kaMthunywa
KWEHLE iyezi elimnyama kuleli ngokudlula emhlabeni kwamalunga amathathu eqembu leSekusile Traditional Dance, abakade besanda kuphatheka emncintiswaneni weChibuku
Neshamwari National Dance obuseMutare Showgrounds ngoMgqibelo.
Iqembu leli, elidabuka eHow Mine esabelweni seMatabeleland South, lihlangane lengozi endaweni engamakhilomitha angamatshumi amabili nxa usuka koBulawayo ngeSonto, lapho imota yabo ebhewuke ngemva kokuba umtshayeli ehluleke ukuyilawula ekhoneni lomgwaqo.
Ingozi le iphinde yatshiya amanye amalunga eqembu elimele kakhulu, njalo basathola usizo lwempilakahle.
Iqembu belincintise ngendlela ethabise abantu nanko lihlanyise inengi ngomgido wesiTshikitsha.
Inhlanganiso yeNational Arts Council of Zimbabwe (NACZ), leyeZimbabwe Traditional Dancers Association kunye lenkampani exhasa iChibuku Neshamwari, iDelta Beverages zethule amazwi enduduzo.
“Iqembu elihlanganisa abagidayo abazinikeleyo abaqhatshwe yiHow Mine eMzingwane District belisiya ekhaya ngesikhathi kusenzakala ingozi le. Okubuhlungu yikuthi amalunga amathathu adlule emhlabeni, uS Mpofu, IT Mike kunye loL Mazara. Amanye amalunga eqembu alimele ngendlela ezehlukeneyo njalo okwamanje athola usizo lwezempilo besemakhaya. Siletha induduzo emulini.
“Ukulahlekelwa lokhu kutshiya isikhala esingeke sivaleke lula emphakathini wethu wezobuciko. Simi ndawonye lamalunga eqembu leSekusile Sitshikitsha njengoba bebhekane laloludubo. Njenge ngatsha ezihlangeneyo zontathu kuChibuku Neshamwari Traditional
Dance Festival, sizimisele ukuxhasa imuli zabedlule emhlabeni lokwazisa umphakathi ngesimo sabalimelyo,” kutsho umbiko wenhlanganiso ze-NACZ, ZNTDA leDelta Beverages.
