Online Reporter
Nkosilathi Sibanda
“Angikhohlwa la engiphuma khona.”
Amazwi la asenhliziyweni zabaculi bakoBulawayo abathathu uMzoe7, uMawiza loSkido, asebehlanganyele ukupheka ingoma egxile lapho abakhulela khona.
Injongo yabo kungoma le ebizwa ngokuthi “Kudala Kwakunganje” igxile ekuthakazeleleni amasiko akuleli lokufundisa isizukulwane ngobuhle bendulo lokunengi okubambe umphakathi.
Abaculi laba bakhumbuza abantu ngesikhathi sakudala, kusagqokwa ngenye indlela ehlukane lakhathesi, kusagadwa imitshova ye-peugot, kungakafiki amakhombi. Bacula njalo ngokuthi kudala abantu babelothando labomakhelwane. Bakhuluma ngezikolo abafunda kuzo, inhlonipho eyayikhona kubazali, ababalisi, obabamkhulu labogogo.
Ngemva kokupheka lingoma, uMzoe7, Mawiza loSkido baphinde benza ividiyo, esivutha amalangabi kunkundla zokuxhumana.
Bahambe bethatha imifanekiso eNtumbane, Nkulumane, Burombo lwakwezinye indawo.
Ekhuluma lephephandaba likazulu, uMzoe7 uthe: “Sikhumbula sisakhula. Sikhumbula ubuhle bamakasi lempilo eyayikhona. Le yimfundiso njalo kwabasakhulayo ukuze bakwazi ukuthi kwakuphilwa njani ngalezo zikhathi. Yingoma emnandi, iyahlabusa, isikhumbuza emuva njalo,” kutsho umculi lo.
“Sibonga usekelo esiluthola kubalandeli bethu. Sikhuluma nje ividiyo isisabelele. Bayithanda okuzwayo abantu, okutsho ukuthi senze umsebenzi omuhle. Kuhle ukuthi sihlangane, sibumbe okunje singabaculi bakoBulawayo.”
