adminNgokuqhubeka kwezinsuku lamahola uBubbles wazizwa esenguye njalo eseqinile. Wenelisa ukuphendula imibuzo ayeyibuzwa, lengqondo yayisithathisisa.
Amapholisa amlungisela incwadi yokubambisa ngesikhathi engakatholi isithupha esitsha. Indaba yokulahla isithupha wayilandisa wabuya njalo wayengeza itshwayi lapho esengozibika ngelithi yena wayevele nje enguyedwana owanyiwa yinyoni.
Lapho elandisa indaba yakhe wayeseyimvu uBubbles lobani lobani wayengamkholwa ukuthi wayeqinisile.
Wayesengu lungile esebalisa lokuthi wayelubhekise eHarare lapho ayesiyadinga khona umsebenzi. Lapha-ke wayewahulula aluhlaza tshoko uBubbles.
Ulandisa konke lokhu nje ngemva kokuhlolisisa umumo wakhe uBubbles, lowayelalele wavuma yedwa ukuthi umuntu lo wayedalelwe uhlupho lobunzima. Wayebalisa uBubbles edala amaqhinga abuye njalo awadilize yedwa.
Wayezibonela laye ukuthi aluba wayengabuyela koBulawayo wayezafika abe ngokabani phezu kokuthi wavela nje watshiya enyele emthonjeni. Wayengamkhangelelwa ngubani uNgonyama?
Wazithethisa ngokuthanda utshwala wabamba eyeka ngelithi wayengasoze aphinde futhi abuthinte utshwala ngomlomo wakhe kodwa umhawu ubuye uthi Bubbles ulamanga azizwe ebufuna khonapho nje.Insuku zatshova elokhu esesibhedlela uBubbles. Kwaze kwathi ngemva kwesikhathi waqala ukutotoba ngezigodo njengoba umbala wakhe owawephukile wawungakaqinisisi. Wenelisa inyanga eziyisithupha esesibhedlela loba nje isikhathi sokuphuma sasesitshayile, akukho lapho ayengaqonda khona. Wayesenza okokucela ukwenza okuyimisetshenzana esibhedlela lapha njengoba wayengeke atshone elele.
Kwathi nje ngelinye ilanga wabona umongikazi Zwelo esiza kuye ebobotheka. Wafika wamkhulumisa ngolozwelo njengesibongo sakhe. Wayemphathele okungamabhanana. Waxoxa laye emazisa ngokuthi wayesezasuka lapha esibhedlela. Wambuza-ke ukuthi njengoba wayelubhekise eHarare ngesikhathi esehlelwa yingozi wayesiyafuna msebenzi bani, lapho uBubbles wazizwa ethinteka kwamancane wathi ngabe abakwabo bayambona. Wazidela ngelithi umuntu onjengaye wayengakhetha yena evele edubekile akukho ayengakukhetha.
Umongikazi Zwelo wamazisa ukuthi wayefisa ukuthi ahambe laye ayemsebenzela, bekungasoze kumvumele ukuthi ayedinga omunye umuntu omutsha. Kwakungcono nje ngoba uBubbles lo wayesemejayele elapha esibhedlela. Lapho uBubbles ingqondo yakhe yayisimakha, esezibona laye esiba ngumuntu ebantwini. Wahle waqalisa ukubamba bamba umhlolelwa lowo owayesebenzela uZwelo embonisa ukuqhutshwa kwenhlelo zalapha ekhaya. Bathutha-ke lemuli yakhe uZwelo, uBubbles laye eseyingxenye yemuli.
Online Reporter