adminOphezulu Stinta
Besisananzelela ukukhuliswa kukaBubbles okulobuhlungu phakathi okungaba lemithelela njalo kundlela yokuziphatha ngobutshapha. Waba nje ngumfana ofunda ukuzinakekela esesemcinyane. Wangena amaqembu ayelemfundiso engaqondanga kungekho loyedwa owayengamkhuza amqondise, ambonise ububi lobuhle bempilo.
Impawu zonke zobubi zazibuzwa kuye umfokaKhoza, wayesengotshova amakhasi enatha utshwala, ekuhotsha okudakayo. Konke lokhu wayekwenza esesesikolo.
Abakhulu besikolo bakunanzelela lokhu ukuziphatha kukaBubbles baxoxisana ngakho. Bakunanzelela njalo ukuthi pho njengoba nje wayeyintandane engelabani wayezaxotshelwa kuliphi iganga. Bazama ukumakha waze wenelisa laye ukufika kubanga lesine okwamenza njalo wenelisa ukuthola umsebenzi eposo wazimisela ngokuqhubeka ngezifundo zebusuku.
Kodwa-ke abadala bathi vele ikhula lamanono ayo. UBubbles wavuka phansi wavutha ngokutshova amakhasi wangena lasezikweledeni kwabanzima. Kwakungasela mehluko lanxa eholile. UNgonyama-ke wayengamthontisi umngane wakhe omkhulu, loba nje wayefike kuye ezokhalaza, lokucela kuphela. Wayengenqabi lutho-ke uNgonyama ngoba wayesithi aluba uBubbles wayengekho ngabe wafa kudala. Wayengalibali imini lapho ayezihlalele khona egangeni ezibalela ingwalo zakhe wavusa ikhanda esevele esejamelane lenkalakatha yemamba emnyama tshu.
Ngalelolanga kakwazi ukuthi uBubbles wamvelela ngaphi. Nguye owahle wayichitha ubuchopho ngembokodo kwaba yikho ukusila kwakhe. Lelolanga kalizange liphume engqondweni kaNgonyama wambonga langebhulugwe njengoba yena wayephuma lapho okuvunde khona. UNgonyama lo ungumuntu olesihelo kanye lothando. Wayemzwela uBubbles ngelithi aluba wakhulela emzini olothando kanye lenhlonipho wayengeke aziphathe ngendlela ayeziphethe ngayo. Konke lokho kuziphatha okungaqondanga wayesola ikhaya likaBubbles.
Siyananzelela ukuthi indlela abantwana abaziphatha ngayo iphuma kumvelaphi yabo ngoba yiyo elemithelela yokuziphatha komntwana. Ngokunjalo laye umtwana kangabi legunya lokuziphatha butshapha ecatsha ngemvelaphi emazombezombe. Umtwana olethuba lemfundo wambulelekile ubulembu obusemehlweni, buyasuswa yimfundo abesezingeni lokukhetha okuzamnceda kusasa. Kodwa-ke ihlongandlebe elinjengoBubbles elikhula lamanono alo liyahamba lihambe lezenzo zalo ekucineni liyavuna ngokufaneleyo.
Kusephakathi kweziphithiphithi zikaBubbles wavakatshela kwelaseBotswana. Lapho wafika khona le wabona intombazana eyisihlophekazi wathembisana layo umtshado. Intombi yayizimisele okwamagama okwala lalapho uyise etshaya phansi ngenduku esithi akalamntwana ozakwendela ezizweni, uBubbles lo wayengathi ulakho athiya ngakho ngezenzo zakhe lalabo abamthandayo kwakungathi amehlo abo asuka afiphale.
Online Reporter