admin
KULIVIKI silodaba lwenye imotsha okubikwa ukuthi yalise amalunga enye imuli yeMakhandeni koBulawayo ukuvalelisa omunye wabo obegcinwe emakhazeni ayo.Kube luthuli emangcwabeni eLuveve amalunga aleyomuli esesidla amalahle ukuthi kungani abemotsha le bethwale isidumbu basisa emangcwabeni bengavalelisanga omunye wabo (body viewing) khona kulisiko elaziwayo.
Kuzithombe ezisezandleni zaleliphephandaba esinye isisebenzi semotsha le sibonakala sibaleka siphethe enye impahla yemotsha le sesihlaselwa ngamalunga emuli le akade engazwisisi indlela obekuqhutshwa ngawo umngcwabo lo.
Kubikwa icala ebelisetheswa abemotsha le ngelokuthi bathwale isidumbu baya laso emangcwabeni eLuveve kulezihlobo ezintathu nje kuphela zikamuyi bathi kasisekho isikhathi sokuthi kuqhutshwe linkonzo.
Kuyadanisa ukuthi inkampani le iphathe abantu abangenisa imali kiyo ngendlela efana lale. Abelungu bathi bona umthengi yinkosi, ngokufanayo lalabo abahamba emotsha besiyadinga uncedo kumbe ama-services abo kumele baphathwe njengenkosi. Angithi nje kwakube kuhle ukuthi abantu babikelwe kuseselesikhathi ngohlelo ukuze balungiselele bafike kuleyondawo ngesikhathi esifaneleyo. Pho-ke nxa bengabikelwanga kodwa bakhanye sebegijinyiswa ngesikhathi bedabukile njalo bebuthakathaka enhliziyweni kubizwa kuthiweni lokhu.
Ukufa phakathi kwabantu abansundu kuyahlonitshwa kungakho isenzo semotsha le silihlazo esintwini ngoba sibangele ukuthi amalunga emuli le ehluleke ukulandela imikhuba yawo kanye lamasiko abo ekungcwatshweni kwesihlobo sabo esibatshiyileyo. Angithi nje isizwe yisizwe ngemikhuba lamasiko aso.
Isiphatho sabo silakho njalo ukubangela ukuthi bacine bebalekelwa ngabantu ngoba bengazange baqhube kuhle umsebenzi wabo.
Kambe lanxa amalunga emuli le engacabangela ukuthi kuyenzakala ukuthi kababekanga isihlobo sabo sodwa kungalandulwa ngubani lokhu.
Imuli le iveze njalo ukuthi ike yazama ukuthi ivalelise isihlobo sayo khona emangcwabeni kodwa yaliswa kwathiwa bayebonela phandle ngoba labekhansili besebengenele indaba le. Amazwi la ahlabe athophela kwaba buhlungu ngamandla kumuli le ngoba bekufana lomuntu ofaka isawudo esilondeni esitsha.
Kuyadingeka ukuthi kumankampani afana lalawo kube lemithetho ebekwe phansi elawula indlela abasebenza ngayo ukuze baqhube kuhle inhlelo zabo. Ukufa yisehlakalo esibuhlungu kungakho ngokufanayo labo abadubekileyo kumele baphathwe kuhle njalo kuhlonitshwe izifiso zabo kanye lamalungelo abo ngazo zonke izikhathi.
Online Reporter