Online Reporter
Nkosilathi Sibanda
ABAFUNDI ababhale imihloliso kaGrade 7 sebengaya thatha impumela yabo ezikolo, balungiselele ukuqhubekela phambili ngezifundo besiya kuForm 1 ngomnyaka ozayo.
Lokhu kuza ngemva kokubika kweZimbabwe School Examinations Council (Zimsec) ngoLwesihlanu.
IZimsec ithe kumihloliso le, isilinganiso sabantwana abaphumeleleyo sibe ku-48.49 phesenti ilizwe lonke njalo kwabhala abafundi abangu-395 429.
Ngomnyaka ka2024, isilinganiso sabafundi abaphumelelayo saba yi-49.01 phesenti.
Kumbiko wakhe ngempumela yemihloliso le, umgcinisihlalo webhodi yeZimsec uSikhwicamfundo Paul Mapfumo, uthe: “I-Zimbabwe School Examinations Council ithanda ukwazisa ukuba impumela yemihloliso kaGrade 7 yalonyaka isikhona.”
IZimsec ibike ukuba impumela yemihloliso izatholakala ebulenjini okwamalanga amane kusukela lamuhla ekhasini leZimsec: https://results.zimsec.co.zw/
“Ikhasi lobulembu lizavulwa okwamalanga amane. Ngemva kwalokhu, abafundi bazathola impumela yabo lapho abaloba khona imihloliso,” kutsho umbiko weZimsec.
