Online Reporter
UTHANDO lungumanqoba ngoba lapho okulothando khona ubona abantu bebobotheka yonke into imnandi ngakho-ke kuhle ukuthi uthande umuntu wakho kunye lemuli yakho zikhathi zonke.
Abantu bakudala babelwazi uthando njalo imizi yabo yayihlala iqinile. Umuntu wayekhetha ukuthi ahlale lomuntu ongelanotho, ongela ngitsho lenkomo ngoba emnika uthando olujulileyo njalo oluvutha bhe!
Lamuhla akusekho konke lokhu, abantu sebegijimisa imali kuphela lobunandi bedolobho bekhohlwa ukuthi kumele banike omkabo uthando oluyintokozo lenjabulo enkulu.
Yebo impilo esiyiphila kulezinsuku ifuna imali kodwa-ke ungakhohlwa ukuthi uthando ngeke uluthenge, lapho ofisa ukuthandwa khona thanda lawe ngendlela efaneleyo. Uthola indoda ingena emsebenzini ekuseni itshayise ebusuku.
Ekutshayiseni idlule ebhawa ingene ebusuku umama eselele, ivuke futhi ekuseni iye emsebenzini ize ngobusuku futhi.
Umdeni ucina ungasakwazi ukuthi kulobaba ekhaya. Yikho-ke lapho okucina kungena igenga elizakhohlisa umkakhe, elizathatha indawo yakho emzini wakho ngoba wena ungelandaba lokuchitha isikhathi lemuli yakho.
Isenzo lesi sibi, kudinga ukuba nxa uyindoda uthethe uguquke ngoba umkakho uyasidinga laye isikhathi sokubalawe.
Abantu besifazane banjengabantwana, umfazi uyabe efuna isikhathi sokuba lomkakhe. Owesifazane ungamupha leso isikhathi uyabe umjabulise kakhulu, uzambona ezimuka esiba yindlovukazi okutshengisa ukuthi uphethwe kuhle.
Akhona amanye amododa achitha isikhathi sawo labomakhwapheni ababachithela imizi yabo. Labo abenza lokhu bakhumbula emuva nxa izikhwama sezibetha umoya kodwa ngesikhathi beselemali bayabe bezitshaya izifuba bengazi ukuthi kayisikho kutshengisa omunye wakho uthando lokhu.
Nxa umuntu wakho umthanda uzambona laye ekuthanda. Ungaze utshone emsebenzini bona ukuthi uyamfonela umbuze ukuthi utshone njani umtshele njalo ukuba uyamthanda.
Uthando vele lona lungumanqoba njalo kakho ngitsho loyedwa owala ukuthandwa ngoba lokhu kuyindalo yethu njengabantu. Kuyadingeka ukuthi ezimulini abantu bathandane ngazo zonke izikhathi ukuze imizi ingachitheki njengalokhu esesikubona kunsuku zalamuhla lapho imizi esichitheka ebusuku lemini kungabi ndaba zalutho ngitsho.
Nyakenye kubikwa kube lezimuli ezingu-3 214 ezibhalele umthethwandaba omkhulu sicela isehlukaniso. Inani lemitshado edinga ukuchithwa leli likhuphuke lisuka ku-2 149 ngomnyaka ka-2023 okutshengisa ukuba izimuli ezinengi ziyaqhelelana.
Ukuchitheka kwemitshado lokhu kubangelwa yizizatho ezehlukeneyo, phakathi kwazo ezigoqela ukungathembani emtshadweni, ukusweleka kwemali, ukwehluleka ukukhulumisana kunye lokuxabana kungakhunyiswana umlotha.
Kodwa kungumbono kaMthunywa ukuthi aluba kungaba lothando ezimulini inani lemitshado le echithekayo lingehla ngoba uthando lwenza umuntu angananzeleli amanye amaphutha ngoba ejabula.
Kubalulekile-ke ukuba wonke umuntu aziphe umlandu wokuthanda lo amkhethayo njalo angaze akhohliswa ngamaluba omhlaba ngoba aphanga edlule njengobukhosi obufana lamazolo.
